ഡ്രൈവിംഗ് ടെസ്റ്റിൽ റിവേഴ്സ് ക്യാമറയും സെൻസറുകളും ഉപയോഗിക്കാം; മോട്ടോർ വാഹന വകുപ്പിന്റെ സുപ്രധാന പരിഷ്കാരം
സംസ്ഥാനത്തെ ലൈറ്റ് മോട്ടോർ വെഹിക്കിൾ (LMV) വിഭാഗത്തിന്റെ ഡ്രൈവിംഗ് ടെസ്റ്റിൽ സുപ്രധാന പരിഷ്കാരങ്ങളുമായി മോട്ടോർ വാഹന വകുപ്പ് (MVD). ഇനിമുതൽ ഡ്രൈവിംഗ് ടെസ്റ്റിലെ ഏറ്റവും പ്രധാനപ്പെട്ട ‘എച്ച്’ (H) ഘട്ടത്തിൽ റിവേഴ്സ് ക്യാമറകളുടെയും പാർക്കിംഗ് സെൻസറുകളുടെയും സഹായം തേടാൻ പരീക്ഷാർത്ഥികൾക്ക് അനുമതി നൽകും. കേന്ദ്ര മോട്ടോർ വാഹന നിയമത്തിൽ വരുത്തിയ പുതിയ ഭേദഗതികൾ പിൻപറ്റിയാണ് കേരളത്തിലും ഈ മാറ്റം നടപ്പിലാക്കാൻ ഒരുങ്ങുന്നത്. വാഹന നിർമ്മാണ മേഖലയിലെ സാങ്കേതിക മുന്നേറ്റങ്ങൾ മുൻനിർത്തി പരീക്ഷകൾ പരിഷ്കരിക്കണമെന്ന ദീർഘനാളത്തെ ആവശ്യത്തിനാണ് ഇതോടെ പരിഹാരമാകുന്നത്.
ഇതുവരെയുള്ള നിയമപ്രകാരം ഡ്രൈവിംഗ് ടെസ്റ്റിനിടെ വാഹനങ്ങളിലെ റിയർ വ്യൂ ക്യാമറകളോ ഡിസ്പ്ലേകളോ ഉപയോഗിക്കുന്നത് പൂർണ്ണമായി വിലക്കിയിരുന്നു. വശങ്ങളിലെ സൈഡ് മിററുകളും കാറിനുള്ളിലെ റിയർ വ്യൂ മിററും മാത്രം നോക്കി കൃത്യമായി വാഹനം പിന്നോട്ടെടുക്കുന്നവരെ മാത്രമാണ് പരീക്ഷയിൽ വിജയിപ്പിച്ചിരുന്നത്. എന്നാൽ പുതിയ നിയമപ്രകാരം ക്യാമറ ഉപയോഗിക്കാമെങ്കിലും, പരീക്ഷാർത്ഥികൾ പൂർണ്ണമായും ഡിസ്പ്ലേയിലേക്ക് മാത്രം നോക്കി വാഹനം ഓടിക്കാൻ പാടില്ല. പരമ്പരാഗത രീതിയിലുള്ള മിററുകൾ കൂടി കൃത്യമായി നിരീക്ഷിച്ച് വേണം വാഹനം നിയന്ത്രിക്കാൻ. ഡാഷ്ബോർഡിലെ ക്യാമറ സ്ക്രീനിൽ മാത്രം നോക്കിയാണ് ഡ്രൈവ് ചെയ്യുന്നതെന്ന് കണ്ടെത്തിയാൽ അത് അയോഗ്യതയ്ക്ക് കാരണമാകുമെന്ന് അധികൃതർ വ്യക്തമാക്കുന്നു.
അതേസമയം, തനിക്ക് 18 വയസ്സ് തികയുന്നതിന് മുൻപ് ഡ്രൈവിംഗ് ലൈസൻസ് ലഭിച്ചുവെന്ന വിവാദത്തിൽ പ്രതികരണവുമായി മുൻ മന്ത്രി കെ.ബി. ഗണേഷ് കുമാർ രംഗത്തെത്തി. തനിക്ക് അപേക്ഷ നൽകാനേ സാധിക്കൂ എന്നും ലൈസൻസ് പിടിച്ചുവാങ്ങാൻ കഴിയില്ലെന്നും പറഞ്ഞ അദ്ദേഹം, ഇതിൽ ഉദ്യോഗസ്ഥർക്കാണ് വീഴ്ച സംഭവിച്ചതെന്ന് കുറ്റപ്പെടുത്തി. ലൈസൻസിൽ പേരിനൊപ്പം ‘എംഎൽഎ’ എന്ന് ചേർത്തത് ഉദ്യോഗസ്ഥർ ടൈപ്പ് ചെയ്തപ്പോൾ സംഭവിച്ചതാണെന്നും അപേക്ഷയിൽ താൻ അത് രേഖപ്പെടുത്തിയിട്ടില്ലെന്നും അദ്ദേഹം വ്യക്തമാക്കി. ഇതിന്റെ പേരിൽ തന്റെ ലൈസൻസ് റദ്ദാക്കാമെന്ന് ആരും കരുതേണ്ടെന്നും അദ്ദേഹം മാധ്യമങ്ങളോട് പ്രതികരിച്ചു.
