പശ എന്തുകൊണ്ടാണ് കുപ്പിക്കുള്ളിൽ ഒട്ടിപ്പിടിക്കാത്തത്?
പേപ്പറുകളും മറ്റ് വസ്തുക്കളും ഒട്ടിക്കാൻ നമ്മൾ നിത്യേന പശ ഉപയോഗിക്കാറുണ്ട്. എന്നാൽ ഈ പശ എന്തുകൊണ്ടാണ് അത് സൂക്ഷിച്ചിരിക്കുന്ന കുപ്പിയുടെ ഉള്ളിൽ ഒട്ടിപ്പിടിക്കാത്തത് എന്ന് എപ്പോഴെങ്കിലും ചിന്തിച്ചിട്ടുണ്ടോ? ഇതിന് പിന്നിൽ ലളിതമായ ചില ശാസ്ത്രീയ കാരണങ്ങളാണുള്ളത്. പശ ഉണങ്ങാത്തതുകൊണ്ടാണ് അത് കുപ്പിക്കുള്ളിൽ ഒട്ടിപ്പിടിക്കാത്തത് എന്നതാണ് ഇതിന്റെ പ്രധാന ഉത്തരം.
നമ്മൾ സാധാരണയായി ഉപയോഗിക്കുന്ന പശകളിൽ പോളിമറുകളെ ഒരു ലായകത്തിൽ (solvent) ലയിപ്പിച്ചാണ് സൂക്ഷിക്കുന്നത്. കുപ്പിക്കുള്ളിൽ ആയിരിക്കുമ്പോൾ ഈ ലായകം പോളിമറുകൾ തമ്മിൽ പരസ്പരം ഒട്ടിപ്പിടിക്കുന്നത് തടയുന്നു. എന്നാൽ ഈ പശ പേപ്പറിലോ തടിയിലോ പുരട്ടുമ്പോൾ, അതിലടങ്ങിയിരിക്കുന്ന ലായകം വായുവിൽ നീരാവിയായി ഇല്ലാതാവുകയും പോളിമറുകൾ തമ്മിൽ ഒട്ടിപ്പിടിച്ച് കട്ടിയാവുകയും ചെയ്യുന്നു. കുപ്പിയിൽ പശ തീരാറാകുമ്പോൾ ബാക്കിയുള്ള പശ കട്ടയാകുന്നത് കുപ്പിക്കുള്ളിലെ വായുവിലേക്ക് ലായകം ലയിച്ചുചേരുന്നതുകൊണ്ടാണ്.
എന്നാൽ സൂപ്പർ ഗ്ലൂ പോലെയുള്ള പശകളുടെ പ്രവർത്തനം ഇതിൽ നിന്നും തികച്ചും വ്യത്യസ്തമാണ്. ഇത്തരം പശകൾ ഒട്ടണമെങ്കിൽ ജലാംശം ആവശ്യമാണ്. നമ്മൾ പ്രത്യേകം വെള്ളം ചേർക്കേണ്ടതില്ലെങ്കിലും, സൂപ്പർ ഗ്ലൂ തുറന്ന് പുറത്തേക്ക് പുരട്ടുമ്പോൾ അന്തരീക്ഷത്തിലുള്ള ജലബാഷ്പം (moisture) വലിച്ചെടുത്ത് അത് പെട്ടെന്ന് കട്ടപിടിക്കുന്നു. അതുകൊണ്ട് തന്നെ സൂപ്പർ ഗ്ലൂ ട്യൂബുകൾ തുറന്നുവെച്ചാൽ അതിനുള്ളിലേക്ക് ജലബാഷ്പം കയറുകയും ബാക്കിയുള്ള പശ ഉള്ളിലിരുന്ന് തന്നെ കട്ടപിടിക്കുകയും ചെയ്യും.
