നടൻ വിനോദ് കോവൂറിന് അപകടം; വാട്ടർ ടാങ്കിൽ വീണ് വാരിയെല്ലിന് പരിക്ക്
പ്രശസ്ത ഹാസ്യ നടൻ വിനോദ് കോവൂർ വലിയൊരു അപകടത്തിൽ നിന്നും തലനാരിഴയ്ക്ക് രക്ഷപ്പെട്ടു. താമസിക്കുന്ന ഫ്ലാറ്റിലെ കോൺക്രീറ്റ് വാട്ടർ ടാങ്കിലേക്ക് വീണ് അദ്ദേഹത്തിന്റെ വാരിയെല്ലിന് ഗുരുതരമായി ചതവേറ്റു. അപകടവിവരം താരം തന്നെയാണ് തന്റെ ഫേസ്ബുക്ക് പേജിലൂടെ ആരാധകരെ അറിയിച്ചത്. നിലവിൽ ഡോക്ടർമാരുടെ നിർദ്ദേശപ്രകാരം അദ്ദേഹം വിശ്രമത്തിലാണ്.
‘മറിമായം’ പരമ്പരയുടെ ചിത്രീകരണം കഴിഞ്ഞ് രാത്രി പത്തരയോടെയാണ് വിനോദ് ഫ്ലാറ്റിൽ തിരിച്ചെത്തിയത്. തുടർന്ന് മാലിന്യം കളയാനായി താഴത്തെ കാർ പാർക്കിംഗ് ഏരിയയിലേക്ക് പോയതായിരുന്നു അദ്ദേഹം. വേസ്റ്റ് കളഞ്ഞ ശേഷം ബക്കറ്റ് കഴുകാനായി നടന്നപ്പോൾ, ശരിയായി അടച്ചിട്ടില്ലായിരുന്ന ടാങ്കിന്റെ ഇരുമ്പ് മൂടി തുറന്ന് അദ്ദേഹം ഉള്ളിലേക്ക് വീഴുകയായിരുന്നു. ആഴമുള്ള ടാങ്കിലേക്ക് വീണെങ്കിലും ഭാഗ്യത്തിന് അതിന്റെ അരികിൽ പിടിച്ച് തൂങ്ങിക്കിടക്കാൻ അദ്ദേഹത്തിന് സാധിച്ചു.
ടാങ്കിൽ നിന്ന് രക്ഷപ്പെടാൻ രണ്ടുതവണ ശ്രമിച്ചെങ്കിലും പരാജയപ്പെട്ടു. ഒടുവിൽ ഏറെ പ്രയത്നിച്ചാണ് അദ്ദേഹം പുറത്തുകടന്നത്. ശ്വാസമെടുക്കാൻ ബുദ്ധിമുട്ടും കടുത്ത വേദനയും അനുഭവപ്പെട്ടതിനെ തുടർന്ന് ഫ്ലാറ്റിലെ സെക്യൂരിറ്റിയും മറ്റുള്ളവരും ചേർന്ന് അദ്ദേഹത്തെ ഉടൻ തന്നെ സമീപത്തെ സ്പെഷ്യാലിറ്റി ആശുപത്രിയിൽ എത്തിച്ചു. എക്സ്റേയിൽ എല്ലിന് പൊട്ടലില്ലെന്ന് വ്യക്തമായെങ്കിലും വാരിയെല്ലിന് കടുത്ത ചതവുണ്ടെന്ന് ഡോക്ടർമാർ അറിയിച്ചു. 48 മണിക്കൂർ വിശ്രമിക്കാനും വേദന കുറഞ്ഞില്ലെങ്കിൽ സിടി സ്കാൻ ചെയ്യാനും ഡോക്ടർമാർ നിർദ്ദേശിച്ചിട്ടുണ്ട്.
