സ്ത്രീ ശാക്തീകരണത്തിന്റെയും സ്ത്രീ സമത്വത്തിന്റെയും ഭാഗമായി കെ.എസ്.ആർ.ടി.സി ഓർഡിനറി ബസുകളിൽ സ്ത്രീകൾക്കായി സൗജന്യ യാത്രാ പദ്ധതിക്ക് തുടക്കമായി. യാത്ര പൂർണ്ണമായും സൗജന്യമാണെങ്കിലും, ബസിൽ കയറുന്ന സ്ത്രീകൾ കണ്ടക്ടറിൽ നിന്നും ‘സീറോ ടിക്കറ്റ്’ നിർബന്ധമായും വാങ്ങി സൂക്ഷിക്കണമെന്ന് അധികൃതർ അറിയിച്ചു. തമ്പാനൂരിൽ നിന്നും സെക്രട്ടറിയേറ്റിലേക്ക് നടത്തിയ ചരിത്രപ്രധാനമായ യാത്രയോടെയാണ് ഈ പുതിയ പദ്ധതിക്ക് തുടക്കമിട്ടത്.

എ.പി.എൽ - ബി.പി.എൽ വ്യത്യാസമോ, പ്രായഭേദമോ, സ്വദേശി-പരദേശി വ്യത്യാസമോ ഇല്ലാതെ ഏതൊരു സ്ത്രീക്കും യാതൊരുവിധ മുൻകൂർ രജിസ്ട്രേഷനും കൂടാതെ ഈ സൗജന്യ സേവനം ഉപയോഗപ്പെടുത്താം. ഓർഡിനറി ബസുകൾക്ക് പുറമെ ടൗൺ ടു ടൗൺ, ലിമിറ്റഡ് സ്റ്റോപ്പ് ഓർഡിനറി, ഗ്രാമവണ്ടികൾ എന്നിവയിലും ഈ സൗജന്യ യാത്ര ലഭ്യമാണ്. സീറോ ടിക്കറ്റ് വാങ്ങുന്നത് സർക്കാരിന് യാത്രാക്കണക്കുകൾ കൃത്യമായി സൂക്ഷിക്കാൻ സഹായിക്കുമെന്നും, ഭാവിയിൽ ഈ ടിക്കറ്റുകൾ കൈവശം വെക്കുന്നവർക്ക് ചില പ്രത്യേക പ്രയോജനങ്ങൾ ലഭിക്കാൻ സാധ്യതയുണ്ടെന്നും അധികൃതർ വ്യക്തമാക്കി.

Also read

പങ്കാളിയുടെ മനസ്സിലിരുപ്പും നിങ്ങളുടെ ബന്ധത്തിലെ പുതിയ മാറ്റങ്ങളും കൊല്ലത്ത് കെഎസ്ആർടിസി ബസ് ഉദ്ഘാടനത്തിനിടെ മന്ത്രി ബിന്ദു കൃഷ്ണയുടെ തലയിൽ ചൂടുപായസം വീണു

1938 ഫെബ്രുവരിയിൽ ചിത്തിര തിരുനാൾ മഹാരാജാവ് നടത്തിയ ചരിത്ര യാത്രയ്ക്ക് ശേഷം പൊതുഗതാഗത രംഗത്ത് ഉണ്ടാകുന്ന ഏറ്റവും വലിയ നാഴികക്കല്ലായാണ് ഈ പദ്ധതിയെ വിശേഷിപ്പിക്കുന്നത്. കഴിഞ്ഞ പത്ത് വർഷത്തിനിടയിൽ സ്വകാര്യ ബസുകളുടെ എണ്ണം 33,000-ൽ നിന്ന് 8,000 ആയി കുറയുകയും കെ.എസ്.ആർ.ടി.സി സർവീസുകൾക്ക് വലിയ തോതിൽ ഇടിവ് സംഭവിക്കുകയും ചെയ്തിട്ടുണ്ട്. ഈ സാഹചര്യത്തിൽ പൊതുഗതാഗത സംവിധാനത്തെ പൂർണ്ണമായി ശക്തിപ്പെടുത്തുക എന്ന ലക്ഷ്യത്തോടെയാണ് സർക്കാർ ഈ പദ്ധതിയുമായി മുന്നോട്ട് പോകുന്നത്.