വി.ഡി സതീശനെ സന്ദർശിച്ച് സജ്ന നൂർ; ഹൃദ്യമായ കുറിപ്പ് പങ്കുവെച്ച് താരം
സൈബർ ആക്രമണങ്ങളും വ്യാജ ആരോപണങ്ങളും നേരിട്ട് മാനസികമായി തളർന്നിരുന്ന ഘട്ടത്തിൽ തനിക്ക് പിന്തുണയുമായി കൂടെ നിന്ന വി.ഡി. സതീശനെ സന്ദർശിച്ച അനുഭവം പങ്കുവെച്ച് നടി സജ്ന നൂർ. വി.ഡി. സതീശനൊപ്പം നിൽക്കുന്ന ചിത്രത്തോടൊപ്പം ഫേസ്ബുക്കിൽ പങ്കുവെച്ച ഹൃദ്യമായ കുറിപ്പിലൂടെയാണ് താരം തന്റെ നന്ദിയും സ്നേഹവും അറിയിച്ചത്. പ്രതിസന്ധി ഘട്ടത്തിൽ ഒരു സഹോദരനെപ്പോലെ തനിക്ക് നീതി ലഭിക്കാൻ അദ്ദേഹം ഒപ്പം നിന്നുവെന്ന് സജ്ന കുറിച്ചു.
തന്റെ കണ്ണീരിന്റെ ഭാഷ മനസ്സിലാക്കിയത് ഒരു ഭരണാധികാരിയെന്ന നിലയിലല്ല, മറിച്ച് ഒരു സഹോദരനെപ്പോലെയാണെന്ന് സജ്ന തന്റെ ഫേസ്ബുക്ക് കുറിപ്പിൽ വ്യക്തമാക്കുന്നു. ചുറ്റുമുള്ളവർ പോലും തെറ്റിദ്ധരിക്കുകയും സൈബർ ആക്രമണങ്ങൾ തളർത്താൻ ശ്രമിക്കുകയും ചെയ്തപ്പോൾ, തന്റെ പരാതികളെ വെറുമൊരു ഫയലായി കാണാതെ ഹൃദയം കൊണ്ട് കേൾക്കാൻ അദ്ദേഹം തയ്യാറായി. അധികാരം പലർക്കും ഉണ്ടാകാമെങ്കിലും മറ്റുള്ളവരുടെ വേദന മനസ്സിലാക്കുന്ന ഹൃദയം എല്ലാവർക്കും ഉണ്ടാകില്ലെന്നും സജ്ന കൂട്ടിച്ചേർത്തു.
മുൻപ് രാഷ്ട്രീയത്തോട് പ്രത്യേക താല്പര്യമില്ലാതിരുന്ന തനിക്ക്, ജനങ്ങളുടെ വേദന മനസ്സിലാക്കുന്ന ഇത്തരം നേതാക്കളെ കാണുമ്പോൾ രാഷ്ട്രീയത്തോടുള്ള കാഴ്ചപ്പാട് തന്നെ മാറിയതായും യു.ഡി.എഫ് പ്രസ്ഥാനത്തോടും വലിയ ആദരവ് തോന്നുന്നതായും താരം കുറിച്ചു. ജീവിതത്തിലെ ഏറ്റവും ഇരുണ്ട ദിവസങ്ങളിൽ തനിക്ക് പ്രതീക്ഷയും കരുത്തും നൽകി കൂടെനിന്ന തന്റെ പ്രിയപ്പെട്ട സുഹൃത്തുക്കൾക്കും സജ്ന തന്റെ കുറിപ്പിലൂടെ പ്രത്യേക നന്ദി രേഖപ്പെടുത്തിയിട്ടുണ്ട്.
