പുരുഷന്മാർക്ക് സൗജന്യ യാത്ര കൊടുത്താൽ എന്ത് സംഭവിക്കും? രസകരമായ മറുപടിയുമായി സതീശൻ
കെഎസ്ആർടിസിയിൽ പുരുഷന്മാർക്ക് സൗജന്യ യാത്ര അനുവദിച്ചാൽ എന്ത് സംഭവിക്കുമെന്ന ചോദ്യത്തിന് രസകരമായ മറുപടിയുമായി വി.ഡി. സതീശൻ. സ്ത്രീകൾക്ക് മാത്രം സൗജന്യ യാത്ര അനുവദിക്കുന്നതിനെതിരെ മെൻസ് അസോസിയേഷൻ രംഗത്തുവന്ന പശ്ചാത്തലത്തിലാണ് തമാശ രൂപേണയുള്ള ഈ പ്രതികരണം ഉണ്ടായത്.
പുരുഷന്മാർക്ക് സൗജന്യ യാത്ര നൽകിയാൽ അതിലൂടെ മിച്ചംവരുന്ന പണം ഒടുവിൽ സർക്കാരിലേക്ക് തന്നെ തിരിച്ചെത്തുമെന്നും, എന്നാൽ സ്ത്രീകൾക്ക് ലഭിച്ചാൽ ആ പണം അവരുടെ വീട്ടിലെത്തുമെന്നുമാണ് അദ്ദേഹം പറഞ്ഞത്. ഈ പദ്ധതിയെ സംസ്ഥാനത്തെ സ്ത്രീകൾക്ക് നൽകുന്ന ആദരവായി കാണണമെന്നും, സ്ത്രീകളെ ബഹുമാനിക്കാൻ സമൂഹം പഠിക്കണമെന്ന സന്ദേശമാണ് ഇതിലൂടെ നൽകുന്നതെന്നും അദ്ദേഹം കൂട്ടിച്ചേർത്തു.
ഈ പദ്ധതിയുടെ ഭാഗമായി സർവീസ് നടത്തുന്ന ബസിലെ ഡ്രൈവറും കണ്ടക്ടറും വനിതകളാണെന്ന പ്രത്യേകതയുമുണ്ട്. കൂടാതെ, ഗതാഗത വകുപ്പ് സെക്രട്ടറിയായി ചുമതലയേറ്റ വനിതാ ഉദ്യോഗസ്ഥയാണ് ഈ പദ്ധതിയുടെ ഉത്തരവിറക്കിയത്. ഈ പദ്ധതി മൂലം സ്വകാര്യ മേഖലയ്ക്ക് എന്തെങ്കിലും നഷ്ടമുണ്ടായാൽ അത് നികത്താൻ സർക്കാർ ആവശ്യമായ നടപടികൾ സ്വീകരിക്കുമെന്നും അദ്ദേഹം ഉറപ്പുനൽകി.
