പ്രിയദർശിനി പദ്ധതി ഉദ്ഘാടനത്തിനിടെ മന്ത്രി ബിന്ദു കൃഷ്ണയുടെ തലയിൽ ചൂടുപായസം വീണു
കൊല്ലം കെഎസ്ആർടിസി ഡിപ്പോയിൽ നടന്ന പ്രിയദർശിനി പദ്ധതിയുടെ ഉദ്ഘാടന ചടങ്ങിനിടെ മന്ത്രി ബിന്ദു കൃഷ്ണയുടെ തലയിൽ ചൂടുപായസം വീണു. യൂത്ത് കോൺഗ്രസിന്റെ നേതൃത്വത്തിൽ ബസിനുള്ളിൽ വെച്ച് പായസവിതരണം നടത്തുന്നതിനിടയിലാണ് അപ്രതീക്ഷിതമായി ഈ സംഭവം ഉണ്ടായത്. മാധ്യമങ്ങൾ ഈ ദൃശ്യങ്ങൾ തത്സമയം പകർത്തുകയും ചെയ്തു.
പായസം തലയിൽ വീണതിനെ തുടർന്ന് ഞെട്ടലോടെ സീറ്റിൽ നിന്ന് എഴുന്നേറ്റ മന്ത്രിയെ ഒപ്പമുണ്ടായിരുന്നവർ ഷാളും മറ്റ് വസ്ത്രങ്ങളും ഉപയോഗിച്ച് വൃത്തിയാക്കുകയായിരുന്നു. ഇതിനുശേഷം ചിന്നക്കട വരെ ബസിൽ യാത്ര ചെയ്ത ശേഷമാണ് അവർ മടങ്ങിയത്. ഇതേസമയം, സംസ്ഥാന സർക്കാരിന്റെ സ്ത്രീകൾക്കായുള്ള സൗജന്യ യാത്രാ പദ്ധതിക്ക് പിന്നാലെ കെഎസ്ആർടിസി ബസുകളിൽ പുതിയ സ്റ്റിക്കറുകൾ പതിപ്പിച്ചത് വലിയ വിവാദത്തിന് വഴിതെളിച്ചിട്ടുണ്ട്.
തിരുവനന്തപുരം നഗരത്തിലെ ഓർഡിനറി ബസുകളിൽ സ്ത്രീകൾക്കുള്ള സൗജന്യ യാത്ര നിഷേധിക്കാനായി മനപ്പൂർവ്വം സിറ്റി ഫാസ്റ്റ് സ്റ്റിക്കറുകൾ പതിപ്പിക്കുകയാണെന്നാണ് ഉയരുന്ന ആക്ഷേപം. എന്നാൽ, യാത്രക്കാർക്ക് എളുപ്പത്തിൽ തിരിച്ചറിയാൻ വേണ്ടിയാണ് 47 സിറ്റി ഫാസ്റ്റ് ബസുകളിൽ സ്റ്റിക്കർ പതിപ്പിച്ചതെന്നും ഓർഡിനറി ബസുകളിൽ സൗജന്യ യാത്ര ലഭ്യമാണെന്നും കെഎസ്ആർടിസി അധികൃതർ വ്യക്തമാക്കി. സിറ്റി ഫാസ്റ്റ്, ഫാസ്റ്റ് പാസഞ്ചർ തുടങ്ങിയ സർവീസുകളിൽ ഈ ആനുകൂല്യം ലഭ്യമല്ലെന്നും അവർ അറിയിച്ചു.
