എയർബസ് എ380: തകർച്ചയിൽ നിന്നും ആകാശത്തേക്ക് തിരിച്ചെത്തിയ ആഡംബര വിമാനം
കോവിഡ് പ്രതിസന്ധികൾക്ക് ശേഷം ലോകമെമ്പാടും യാത്രാക്കാരുടെ എണ്ണത്തിൽ വൻ വർദ്ധനവ് ഉണ്ടായതോടെ, ലോകത്തിലെ ഏറ്റവും വലിയ യാത്രാവിമാനമായ എയർബസ് എ380 (Airbus A380) വീണ്ടും ആകാശത്തേക്ക് ശക്തമായ തിരിച്ചുവരവ് നടത്തുന്നു. ഇന്ധനക്ഷമത കൂടിയ ചെറിയ വിമാനങ്ങളുടെ വരവോടെ 2019-ൽ നിർമ്മാണം നിർത്തിവെക്കുകയും, കോവിഡ് കാലത്ത് പല കമ്പനികളും പൂർണ്ണമായി ഉപേക്ഷിക്കുകയും ചെയ്ത ഈ ഭീമൻ വിമാനങ്ങളെ ലുഫ്താൻസ, ബ്രിട്ടീഷ് എയർവേയ്സ് തുടങ്ങിയ പ്രമുഖ എയർലൈനുകൾ ഇപ്പോൾ വീണ്ടും സർവീസിലേക്ക് തിരികെ കൊണ്ടുവരികയാണ്.
മുപ്പതോളം രാജ്യങ്ങളിലെ 1500 കമ്പനികളിൽ നിന്നുള്ള 40 ലക്ഷത്തോളം ഭാഗങ്ങൾ കൂട്ടിച്ചേർത്താണ് ഈ അത്ഭുത വിമാനം നിർമ്മിച്ചിരിക്കുന്നത്. ഒരു ഫുട്ബോൾ ഗ്രൗണ്ടിനേക്കാൾ വീതിയുള്ള ചിറകുകളും, 575 ടൺ ഭാരവുമുള്ള എ380 വിമാനത്തിന്റെ പെയിന്റിംഗിന് മാത്രം 531 കിലോഗ്രാം ഭാരമുണ്ട്. 22 ടയറുകളുള്ള ഈ ഭീമൻ വിമാനത്തെ ഉൾക്കൊള്ളാൻ ലോകമെമ്പാടുമുള്ള വലിയ എയർപോർട്ടുകൾ കോടിക്കണക്കിന് രൂപ ചിലവഴിച്ചാണ് റൺവേകളും ഡബിൾ ഡെക്കർ ബോർഡിംഗ് ഗേറ്റുകളും നവീകരിച്ചത്.
ഇരുനിലകളിലായി 5900 ചതുരശ്ര അടി സ്ഥലമുള്ള ഈ വിമാനത്തിനുള്ളിൽ ഷവർ ബാത്റൂമുകൾ, ലക്ഷ്വറി ബാർ, പ്രൈവറ്റ് അപ്പാർട്ട്മെന്റുകൾ തുടങ്ങിയ അത്യാഡംബര സൗകര്യങ്ങളാണ് എമിറേറ്റ്സ്, ഇത്തിഹാദ് തുടങ്ങിയ എയർലൈനുകൾ ഒരുക്കിയിരിക്കുന്നത്. എയർബസ് കമ്പനിക്ക് ഈ പ്രൊജക്റ്റ് വലിയ സാമ്പത്തിക നഷ്ടമുണ്ടാക്കുകയും ആകെ 251 വിമാനങ്ങൾ മാത്രം വിൽക്കാൻ സാധിക്കുകയും ചെയ്തെങ്കിലും, യാത്രക്കാരുടെ എണ്ണക്കൂടുതൽ കാരണം എമിറേറ്റ്സ് തങ്ങളുടെ എ380 വിമാനങ്ങൾ 2030-ന് ശേഷവും സർവീസ് നടത്തുമെന്ന് പ്രഖ്യാപിച്ചിട്ടുണ്ട്.
