ഐശ്വര്യവും ധനവും വരാൻ വീടിന്റെ വടക്ക് ഭാഗത്ത് ചെയ്യേണ്ട കാര്യങ്ങൾ
വാസ്തുശാസ്ത്രപ്രകാരം വീടിന്റെ എട്ട് ദിക്കുകളിൽ ഏറ്റവും പ്രധാനപ്പെട്ടതും ധനത്തിന്റെ സ്ഥാനവുമായി കണക്കാക്കപ്പെടുന്നത് വടക്ക് ദിക്കാണ്. ധനത്തിന്റെ അധിപനായ കുബേര ഭഗവാൻ വസിക്കുന്ന ഈ ദിശ എപ്പോഴും വൃത്തിയായും തടസ്സങ്ങളില്ലാതെയും സൂക്ഷിക്കുന്നത് കുടുംബത്തിലേക്ക് ഐശ്വര്യവും സാമ്പത്തിക അഭിവൃദ്ധിയും കൊണ്ടുവരുമെന്നാണ് വിശ്വാസം. വടക്ക് ദിശയിൽ തടസ്സങ്ങളോ ദോഷങ്ങളോ ഉണ്ടായാൽ അത് സാമ്പത്തിക വളർച്ചയെ ദോഷകരമായി ബാധിക്കും.
ലക്ഷ്മീദേവിയെ ധ്യാനിച്ചുകൊണ്ട് വീടിന്റെ വടക്കുഭാഗത്ത് തുളസി, മഞ്ഞൾ, വെറ്റില എന്നീ മൂന്ന് ചെടികൾ നട്ടുപിടിപ്പിച്ച് പരിപാലിക്കുന്നത് ഏറെ ഉത്തമമാണ്. കൂടാതെ, വടക്കുവശത്ത് ജനലുകളുണ്ടെങ്കിൽ അതിനോട് ചേർന്ന് മണിപ്ലാന്റ് വളർത്തുന്നതും നല്ലതാണ്. വടക്ക് ഭാഗം ജലത്തിന്റെ സ്ഥാനം കൂടിയായതിനാൽ താമര വളർത്തുന്ന ടബ്ബുകളോ അക്വേറിയമോ പോലുള്ള ജലസ്രോതസ്സുകൾ ഈ ദിശയിൽ സ്ഥാപിക്കുന്നത് മഹാലക്ഷ്മിയുടെ സാന്നിധ്യത്തിന് തുല്യമായി കണക്കാക്കപ്പെടുന്നു.
പുതിയ വീട് നിർമ്മിക്കുമ്പോൾ തെക്കുവശത്തെ അപേക്ഷിച്ച് വടക്കുഭാഗത്ത് കൂടുതൽ സ്ഥലം വിടുന്നതും ഈ ഭാഗം അല്പം താഴ്ന്നു നിൽക്കുന്നതും നല്ലതാണ്. എന്നാൽ, വടക്കുഭാഗത്ത് മാലിന്യങ്ങൾ കൂട്ടിയിട്ട് കത്തിക്കുകയോ, സെപ്റ്റിക് ടാങ്ക് സ്ഥാപിക്കുകയോ, മലിനജലം ഒഴുക്കുകയോ ചെയ്യരുത്. വീടിന്റെ വടക്കേ ഭിത്തിയിൽ സ്വർണ്ണാഭരണങ്ങൾ ധരിച്ച സ്ത്രീയുടെ ചിത്രങ്ങളോ കലണ്ടറോ തൂക്കുന്നതും സാമ്പത്തിക ഉയർച്ചയ്ക്ക് കാരണമാകും. വീടിന്റെ ദർശനം വടക്കോട്ട് ആയിരിക്കുന്നത് ഏറ്റവും വലിയ ഭാഗ്യമായാണ് വാസ്തുവിൽ പറയുന്നത്.
