ആഗ്രഹങ്ങൾ നടക്കാൻ ബഡാ മംഗൾവാർ ദിനത്തിൽ ചെയ്യേണ്ട ഹനുമാൻ ചാലിസ വ്രതവും എഴുത്ത് വഴിപാടും
ജീവിതത്തിലെ തടസ്സങ്ങൾ നീങ്ങുന്നതിനും ആഗ്രഹങ്ങൾ വേഗത്തിൽ സഫലമാകുന്നതിനുമായി ബഡാ മംഗൾവാർ ദിനത്തിൽ ചെയ്യേണ്ട പ്രത്യേക ഹനുമാൻ ചാലിസ വ്രതാനുഷ്ഠാനങ്ങൾ ഭക്തർക്കായി പങ്കുവെക്കുന്നു. ജ്യേഷ്ഠമാസത്തിലെ ചൊവ്വാഴ്ചകളിൽ വരുന്ന ഈ പുണ്യദിനം ഹനുമാൻ സ്വാമിയുടെ അനുഗ്രഹം സിദ്ധിക്കാൻ ഏറ്റവും ഉത്തമമായിട്ടാണ് കണക്കാക്കപ്പെടുന്നത്. പൂർണ്ണ വിശ്വാസത്തോടെയും നിഷ്ഠയോടെയും ചെയ്യുന്ന പ്രാർത്ഥനകൾക്ക് അതിവേഗം ഫലം ലഭിക്കുമെന്നാണ് വിശ്വാസം.
ഈ പ്രത്യേക ദിവസം രാവിലെ 3:30 മുതൽ 7:00 വരെയുള്ള സമയത്തോ അല്ലെങ്കിൽ വൈകിട്ട് 5:30 മുതൽ രാത്രി 11:00 വരെയുള്ള സമയത്തോ ഈ പൂജ ചെയ്യാവുന്നതാണ്. ഹനുമാൻ സ്വാമിയുടെയോ ശ്രീരാമ പട്ടാഭിഷേകത്തിന്റെയോ ചിത്രത്തിന് മുന്നിൽ വിളക്ക് തെളിയിക്കുകയോ, ചിത്രം ഇല്ലെങ്കിൽ കിഴക്കോട്ട് ജ്വാല വരുന്ന രീതിയിൽ മൺവിളക്കിൽ നല്ലെണ്ണയോ നെയ്യോ അല്ലെങ്കിൽ ജാസ്മിൻ ഓയിലോ ഒഴിച്ച് ദീപം തെളിയിക്കുകയോ ചെയ്യാം. തുടർന്ന് ‘ശ്രീരാമജയം’ അല്ലെങ്കിൽ ‘രാമ രാമ’ മന്ത്രം 108 തവണ ജപിച്ച ശേഷം, ഹനുമാൻ ചാലിസ ഏഴു തവണ ചൊല്ലുകയോ കേൾക്കുകയോ ചെയ്യണം. പഴമാണ് ഇതിനായി നിവേദ്യമായി സമർപ്പിക്കേണ്ടത്.
ഇതിനുശേഷം വരികളില്ലാത്ത ഒരു വെള്ള പേപ്പറെടുത്ത് കറുപ്പ് ഒഴികെയുള്ള പേന ഉപയോഗിച്ച് (ചുവപ്പ് മഷി കൂടുതൽ ഉത്തമം) നമ്മുടെ സങ്കടങ്ങളും ആഗ്രഹങ്ങളും ഹനുമാൻ സ്വാമിക്ക് കത്തെഴുതുന്നതുപോലെ എഴുതുക. ഈ പേപ്പർ സ്വാമിയുടെ ചിത്രത്തിന് മുന്നിൽ സമർപ്പിച്ച് പ്രാർത്ഥിച്ച ശേഷം, അന്ന് രാത്രി ഉറങ്ങുന്നതിന് മുൻപായി കത്തിച്ചു കളയുകയോ അല്ലെങ്കിൽ വെള്ളത്തിൽ ലയിപ്പിച്ചു കളയുകയോ ചെയ്യേണ്ടതാണ്. ഈ ദിവസം പൂർണ്ണമായും സസ്യഭുക്കായിരിക്കണമെന്നും, അശുദ്ധിയുള്ള സമയങ്ങളിൽ ഈ വഴിപാട് ചെയ്യരുതെന്നും പ്രത്യേകം ഓർക്കുക.
