കേന്ദ്ര മന്ത്രിസഭയിൽ വൻ അഴിച്ചുപണി; നാല് കേന്ദ്രമന്ത്രിമാർ രാജിവെച്ചേക്കുമെന്ന് സൂചന
വരാനിരിക്കുന്ന നിയമസഭാ തിരഞ്ഞെടുപ്പുകളിലെ പരാജയഭീതിയും ഭരണപരാജയങ്ങളും മറികടക്കാൻ ലക്ഷ്യമിട്ട് കേന്ദ്ര മന്ത്രിസഭയിലും ബിജെപി സംഘടനയ്ക്കുള്ളിലും അടിയന്തര അഴിച്ചുപണിക്ക് കേന്ദ്ര നേതൃത്വം ഒരുങ്ങുന്നു. അടുത്ത രണ്ടാഴ്ചയ്ക്കുള്ളിൽ പൂർത്തിയാകാൻ പോകുന്ന ഈ പുനസംഘടനയിൽ നാല് പ്രമുഖ കേന്ദ്രമന്ത്രിമാർ രാജിവെക്കേണ്ടി വരുമെന്നാണ് ദില്ലിയിൽ നിന്നുള്ള സൂചനകൾ വ്യക്തമാക്കുന്നത്. കൂടാതെ പന്ത്രണ്ടോളം മന്ത്രിമാരുടെ വകുപ്പുകൾ മാറ്റാനും നിലവിൽ ആലോചനയുണ്ട്.
തിരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളിൽ ഭരണം നിലനിർത്താൻ കേന്ദ്രമന്ത്രിമാരെ തന്നെ പാർട്ടി സംഘടനയിലേക്ക് മടക്കിവിളിക്കേണ്ടി വരുന്നത് ബിജെപിയുടെ സംഘടനാപരമായ ദൗർബല്യമായി വിലയിരുത്തപ്പെടുന്നു. സിബിഎസ്ഇ മൂല്യനിർണയ വിവാദത്തെത്തുടർന്ന് രാജ്യവ്യാപകമായി ഉയർന്ന ജനരോഷത്തിന്റെ പശ്ചാത്തലത്തിൽ കേന്ദ്ര വിദ്യാഭ്യാസ മന്ത്രി ധർമേന്ദ്ര പ്രധാൻ സ്ഥാനത്ത് തുടരുമോ എന്നതും വലിയ പ്രതിസന്ധിയിലാണ്. ഈ വിവാദം സർക്കാരിന്റെ പ്രതിച്ഛായയെ ബാധിച്ചതിനാൽ അദ്ദേഹത്തെ മാറ്റാൻ കേന്ദ്രം നിർബന്ധിതരായേക്കും.
ദേശീയതലത്തിലെ ഈ പ്രതിസന്ധി കേരളത്തിലെ ബിജെപി ക്യാമ്പുകളിലും കനത്ത ആശങ്ക പടർത്തിയിട്ടുണ്ട്. കേന്ദ്രമന്ത്രി ജോർജ് കുര്യൻ പദവിയിൽ തുടരുമോ എന്ന ചോദ്യവും, അനിൽ ആന്റണിയുടെ പേര് പരിഗണിക്കുന്നതിനെതിരെ മുതിർന്ന നേതാക്കളെ അവഗണിക്കുന്നു എന്ന പരാതിയും അണികൾക്കിടയിൽ പ്രതിഷേധത്തിന് കാരണമായിട്ടുണ്ട്. ഉത്തർപ്രദേശ് ഉൾപ്പെടെയുള്ള ഏഴ് സംസ്ഥാനങ്ങളിലെ തിരഞ്ഞെടുപ്പ് മുന്നിൽക്കണ്ട് ജാതി രാഷ്ട്രീയ സമവാക്യങ്ങൾക്ക് മുന്നിൽ കേന്ദ്ര നേതൃത്വത്തിന് വഴങ്ങേണ്ടി വരുന്ന സാഹചര്യമാണ് ഇപ്പോഴുള്ളത്.
