സംസ്ഥാനത്ത് പുതിയ യുഡിഎഫ് സർക്കാർ അധികാരമേറ്റതിനു പിന്നാലെ കോൺഗ്രസിനുള്ളിൽ അതൃപ്തി പുകയുന്നുണ്ടോ എന്ന സംശയങ്ങൾ ഉയരുന്നു. പുതുപ്പള്ളി എംഎൽഎ ചാണ്ടി ഉമ്മനെ മന്ത്രിസഭയിൽ ഉൾപ്പെടുത്താത്തതിൽ അന്തരിച്ച മുൻ മുഖ്യമന്ത്രി ഉമ്മൻ ചാണ്ടിയുടെ കുടുംബത്തിന് കടുത്ത നീരസമുണ്ടെന്നാണ് റിപ്പോർട്ട്.

സത്യപ്രതിജ്ഞ ചടങ്ങിൽ നിന്ന് ഉമ്മൻ ചാണ്ടിയുടെ ഭാര്യ മറിയാമ ഉമ്മനും മകൾ മറിയ ഉമ്മനും വിട്ടുനിന്നത് ഈ അവഗണനയിലുള്ള പ്രതിഷേധ സൂചനയാണെന്നാണ് രാഷ്ട്രീയ കേന്ദ്രങ്ങളിൽ നിന്നുള്ള വിവരം. എങ്കിലും ചടങ്ങിൽ നിന്ന് വിട്ടുനിന്നത് പ്രത്യേക കാരണങ്ങളാൽ അല്ലെന്ന് മകൾ മറിയ ഉമ്മൻ മാധ്യമങ്ങളോട് വിശദീകരിച്ചു.

തിങ്കളാഴ്ച വൈകിയിട്ട് ചാണ്ടി ഉമ്മനും മാതാവ് മറിയാമയും മുതിർന്ന കോൺഗ്രസ് നേതാവ് എകെ ആന്റണിയുടെ വസതിയിൽ എത്തി പരാതി ബോധിപ്പിച്ചു. എകെ ആന്റണി ചാണ്ടി ഉമ്മനെ പുഷ്പങ്ങൾ നൽകിയാണ് സ്വീകരിച്ചത്. ഉമ്മൻചാണ്ടിയുടെ കുടുംബവുമായുള്ള പതിറ്റാണ്ടുകളുടെ പഴയകാലബന്ധങ്ങൾ ആന്റണി ഈ കൂടിക്കാഴ്ചയിൽ സ്മരിച്ചു. ചാണ്ടിയുമ്മന്റെ മാതാവ് മറിയ ഉമ്മന്റെ പ്രത്യേക ആഗ്രഹപ്രകാരമാണ് ഈ സന്ദർശനം നടത്തിയത്.

സത്യപ്രതിജ്ഞ വേദിയിൽ ചാണ്ടിയുമ്മൻ എത്തിയത് വിഐപി പരിഗണനകൾ ഇല്ലാതെയായിരുന്നു. സഹോദരിയുടെ പുത്രനൊപ്പം ചടങ്ങിനെത്തിയ ചാണ്ടിയുമ്മൻ പൊതുജനത്തിനായുള്ള ഗേറ്റിലൂടെയാണ് സ്റ്റേഡിയത്തിനുള്ളിലേക്ക് പ്രവേശിച്ചത്. ജഗതിയിലെ വസതിയിൽ നിന്നും ഒരുകൂട്ടം കോൺഗ്രസ് പ്രവർത്തകർക്കും സുഹൃത്തുക്കൾക്കും ഒപ്പം സെൻട്രൽ സ്റ്റേഡിയത്തിലേക്ക് അദ്ദേഹം നടന്നുവരികയായിരുന്നു. ലൂസിഫർ എന്ന ചിത്രത്തിൽ മോഹൻലാൽ അവതരിപ്പിച്ച സ്റ്റീഫൻ നെടുമ്പിള്ളി എന്ന കഥാപാത്രത്തോടാണ് സോഷ്യൽ മീഡിയ ഈ വരവിനെ ഉപമിക്കുന്നത്.

മാധ്യമങ്ങളെ കണ്ട ചാണ്ടിയുമ്മൻ വൈകാരികമായാണ് പ്രതികരിച്ചത്. ഇതൊരു സ്നേഹസന്ദർശനം മാത്രമാണെന്നും ജനങ്ങളിൽ നിന്നും നേതാക്കളിൽ നിന്നും അനുഭവിച്ച സ്നേഹം വളരെ വലുതാണെന്നും അദ്ദേഹം പറഞ്ഞു. ആർക്കും കിട്ടാത്ത ഒരു സ്ഥാനം തനിക്കുണ്ട് - അത് കേരളത്തിന്റെ മകൻ എന്ന സ്ഥാനമാണ്. മന്ത്രിസഭയിലേക്ക് തുടക്കം മുതൽ തന്റെ പേര് ഉണ്ടായിരുന്നില്ലെന്നും ഇതെല്ലാം മാധ്യമങ്ങൾ ഉണ്ടാക്കിയ വാർത്തകളാണെന്നും അദ്ദേഹം ആരോപിച്ചു.

ഉമ്മൻ ചാണ്ടി ഫൗണ്ടേഷന്റെ പ്രവർത്തനങ്ങൾ കാസർഗോഡ് മുതൽ തിരുവനന്തപുരം വരെ വ്യാപിപ്പിക്കാനും ലഹരിക്കെതിരെയുള്ള വലിയൊരു ജനകീയ മൂവ്മെന്റ് ശക്തമാക്കാനുമാണ് ചാണ്ടി ഉമ്മന്റെ ലക്ഷ്യം. ജനങ്ങളുടെ താഴെത്തട്ടിലുള്ള പ്രശ്നങ്ങളിൽ നേരിട്ട് ഇടപെടുകയും സർക്കാരിന്റെ ശ്രദ്ധയിൽ പെടുത്തി പരിഹാരം കാണുകയും ചെയ്യുമെന്നും അദ്ദേഹം മാധ്യമങ്ങളോട് വിശദീകരിച്ചു.