ധനകാര്യ പ്രതിസന്ധിയും ധവളപത്രവും: വിശദീകരണവുമായി മുഖ്യമന്ത്രി വാർത്താസമ്മേളനത്തിലേക്ക്
സംസ്ഥാനം നേരിടുന്ന ഗുരുതരമായ സാമ്പത്തിക പ്രതിസന്ധിയും 5 ലക്ഷം കോടി രൂപയിലധികം വരുന്ന കടബാധ്യതയും വ്യക്തമാക്കുന്ന ധവളപത്രം നിയമസഭയിൽ സമർപ്പിച്ചതിന് പിന്നാലെ മുഖ്യമന്ത്രി വാർത്താസമ്മേളനം നടത്തുന്നു. മുൻ സർക്കാർ വരുത്തിവെച്ച സാമ്പത്തിക ബാധ്യതകൾ മറികടന്ന് വികസന പ്രവർത്തനങ്ങളുമായി എങ്ങനെ മുന്നോട്ട് പോകുമെന്ന കാര്യത്തിൽ മുഖ്യമന്ത്രി വിശദീകരണം നൽകും.
ഖജനാവിൽ 5000 കോടിയിലധികം രൂപ ബാക്കിവെച്ചിട്ടാണ് പോയതെന്ന മുൻ ധനമന്ത്രിയുടെ വാദങ്ങളെ തള്ളുന്നതാണ് പുതിയ ധവളപത്രത്തിലെ വിവരങ്ങൾ. എന്നാൽ, ഈ ധവളപത്രം ധനകാര്യ വകുപ്പിനെയും സി.എ.ജി.യെയും ഇരുട്ടത്ത് നിർത്തി സ്വകാര്യ ഏജൻസികളെക്കൊണ്ട് തയ്യാറാക്കിയ ഒരു രാഷ്ട്രീയ രേഖ മാത്രമാണെന്നാണ് പ്രതിപക്ഷത്തിന്റെ ആരോപണം. കിഫ്ബിയിലെ ബാധ്യതകളും ഡി.എ കുടിശ്ശികയും അടക്കം വലിയ പ്രതിസന്ധിയാണ് നിലവിലുള്ളതെന്ന് ധവളപത്രം ചൂണ്ടിക്കാണിക്കുന്നു.
ധവളപത്രം സഭയിൽ സമർപ്പിച്ചത് ചട്ടലംഘനമാണെന്ന് പ്രതിപക്ഷം ക്രമപ്രശ്നം ഉന്നയിച്ചെങ്കിലും, മന്ത്രിസഭ അംഗീകരിച്ച രേഖയായതിനാൽ സ്പീക്കർ അത് തള്ളി സഭയുടെ അംഗീകാരം നൽകി. ധനകാര്യ വകുപ്പ് കൂടി കൈകാര്യം ചെയ്യുന്ന മുഖ്യമന്ത്രി, ഈ വലിയ സാമ്പത്തിക പ്രതിസന്ധി പരിഹരിക്കാൻ എന്ത് തന്ത്രമാണ് സ്വീകരിക്കുകയെന്ന് വാർത്താസമ്മേളനത്തിൽ വ്യക്തമാക്കുമെന്നാണ് പ്രതീക്ഷിക്കുന്നത്.
