കുടുംബം തകർത്തത് അമ്മയുടെ സുഹൃത്ത്; നീതി വേണമെന്ന് ആവശ്യപ്പെട്ട് മകൾ
മാതാപിതാക്കളുടെ അപ്രതീക്ഷിത വിയോഗത്തിന് പിന്നാലെ, തങ്ങളുടെ കുടുംബം തകർത്തത് അമ്മയുടെ സുഹൃത്തായ ഹരി എന്ന വ്യക്തിയാണെന്ന ഗുരുതര ആരോപണവുമായി മകൾ രംഗത്ത്. അച്ഛൻ സുരേഷിന്റെയും അമ്മ അസീനയുടെയും മരണത്തിന് കാരണക്കാരനായ ഇയാളെ നിയമത്തിന് മുന്നിൽ കൊണ്ടുവരണമെന്നും യാതൊരു കാരണവശാലും വെറുതെ വിടരുതെന്നും മകൾ മാധ്യമങ്ങളോട് പറഞ്ഞു.
കുടുംബം തിരികെ ലഭിക്കാൻ അച്ഛൻ അമ്മയുടെ കാലുപിടിച്ച് അപേക്ഷിക്കുന്ന അവസ്ഥ വരെ ഉണ്ടായിട്ടും, ഹരിയുടെ സ്വാധീനത്താൽ അമ്മ വഴങ്ങിയില്ലെന്ന് മകൾ വെളിപ്പെടുത്തുന്നു. വെറും ഒരാഴ്ച കൊണ്ടാണ് അമ്മയുടെ മനസ്സ് ഇയാൾ മാറ്റിയെടുത്തത്. കടുത്ത മാനസിക വിഷമത്തിലായിരുന്ന അച്ഛന്റെ മരണവാർത്ത താൻ ടിവിയിലെ വാർത്തകളിലൂടെയാണ് അറിഞ്ഞതെന്നും, തന്നെ മാനസികമായി തളർത്താതിരിക്കാൻ ബന്ധുക്കൾ ഈ വിവരം ആദ്യം മറച്ചുവെക്കുകയായിരുന്നു എന്നും മകൾ കൂട്ടിച്ചേർത്തു.
പൊലീസിൽ നൽകിയ മൊഴിയിൽ ഹരിയുടെ പേര് വ്യക്തമായി പറഞ്ഞിട്ടും എഫ്.ഐ.ആറിൽ വെറും ‘സുഹൃത്ത്’ എന്ന് മാത്രമാണ് രേഖപ്പെടുത്തിയതെന്ന് മകൾ ആരോപിച്ചു. സംഭവം വിവാദമായതോടെ ഒത്തുതീർപ്പിനായി ഇൻസ്റ്റാഗ്രാമിലൂടെ ഹരി തന്നെ ബന്ധപ്പെടാൻ ശ്രമിച്ചെന്നും, എന്നാൽ ഇപ്പോൾ ഇയാൾ ഒളിവിൽ പോയിരിക്കുകയാണെന്നും മകൾ പറഞ്ഞു. അനിയത്തിയെ ഹോസ്റ്റലിൽ വിടാതെ താൻ തന്നെ നോക്കുമെന്നും, മാതാപിതാക്കളെ നഷ്ടപ്പെടുത്തിയ കുറ്റവാളിക്ക് അർഹമായ ശിക്ഷ ഉറപ്പാക്കണമെന്നും മകൾ ആവശ്യപ്പെട്ടു.
