പുകയ്ക്ക് പകരം വെള്ളം പുറന്തള്ളുന്ന ഹൈഡ്രജൻ ബസ് ഡൽഹിയിൽ സർവീസ് ആരംഭിച്ചു
പുകയ്ക്ക് പകരം ശുദ്ധജലം മാത്രം പുറന്തള്ളുന്ന അത്യാധുനിക ഹൈഡ്രജൻ ഫ്യുവൽ സെൽ ബസ് ഡൽഹിയിലെ റോഡുകളിൽ സർവീസ് ആരംഭിച്ചു. ടാറ്റ മോട്ടോഴ്സ്, ഡൽഹി മെട്രോ റെയിൽ കോർപ്പറേഷൻ (DMRC), ഇന്ത്യൻ ഓയിൽ എന്നിവർ സംയുക്തമായി വികസിപ്പിച്ചെടുത്ത ഈ പരിസ്ഥിതി സൗഹൃദ വാഹനം രാജ്യത്തിന്റെ പൊതുഗതാഗത രംഗത്ത് വലിയൊരു വിപ്ലവത്തിനാണ് തുടക്കം കുറിച്ചിരിക്കുന്നത്.
പ്രോട്ടോൺ എക്സ്ചേഞ്ച് മെംബ്രെയ്ൻ (PEM) ഫ്യുവൽ സെൽ സാങ്കേതികവിദ്യയിലാണ് ഈ ബസ് പ്രവർത്തിക്കുന്നത്. വാഹനത്തിന് മുകളിൽ സ്ഥാപിച്ചിട്ടുള്ള ശക്തമായ കാർബൺ ഫൈബർ സിലിണ്ടറുകളിലെ ഹൈഡ്രജനും അന്തരീക്ഷത്തിലെ ഓക്സിജനും തമ്മിൽ ഫ്യുവൽ സെല്ലിനുള്ളിൽ നടക്കുന്ന രാസപ്രവർത്തനത്തിലൂടെയാണ് ഇതിനാവശ്യമായ വൈദ്യുതി ഉത്പാദിപ്പിക്കുന്നത്. കേന്ദ്ര സചിവാലയത്തിൽ നിന്ന് ആരംഭിച്ച് കർത്തവ്യപഥ്, ഇന്ത്യ ഗേറ്റ്, നാഷണൽ സ്റ്റേഡിയം തുടങ്ങിയ പ്രധാന സ്ഥലങ്ങളിലൂടെ കടന്നുപോകുന്ന ഈ സർവീസിന് വെറും 10 മുതൽ 20 രൂപ വരെ മാത്രമാണ് നിരക്ക് ഈടാക്കുന്നത്.
ഇലക്ട്രിക് ബസുകൾ ചാർജ് ചെയ്യാൻ മണിക്കൂറുകൾ ആവശ്യമുള്ളപ്പോൾ, ഹൈഡ്രജൻ ബസിൽ ഇന്ധനം നിറയ്ക്കാൻ വെറും 5 മുതൽ 7 മിനിറ്റ് വരെ മാത്രം മതിയാകും. അതീവ സുരക്ഷിതമായ ടാങ്കുകളും ചോർച്ചയുണ്ടായാൽ മില്ലിസെക്കൻഡുകൾക്കുള്ളിൽ പ്രവർത്തനം നിർത്തുന്ന സെൻസറുകളും തത്സമയ നിരീക്ഷണ സംവിധാനങ്ങളും ഈ ബസിന്റെ സുരക്ഷ ഉറപ്പാക്കുന്നു. നാഷണൽ ഗ്രീൻ ഹൈഡ്രജൻ മിഷന്റെ ഭാഗമായി 2030-ഓടെ പ്രതിവർഷം 50 ലക്ഷം മെട്രിക് ടൺ ഗ്രീൻ ഹൈഡ്രജൻ ഉൽപ്പാദിപ്പിക്കാനാണ് ഇന്ത്യ ലക്ഷ്യമിടുന്നത്.
