കൊതുകിനെ തുരത്താൻ വിക്സും ജാതിക്കയും; വീട്ടിൽ പരീക്ഷിക്കാവുന്ന ലളിതമായ വഴികൾ
വീട്ടിലുള്ള ലളിതമായ ചേരുവകൾ ഉപയോഗിച്ച് കൊതുകുകളെയും ഈച്ചകളെയും പൂർണ്ണമായും തുരത്താനുള്ള പ്രകൃതിദത്ത മാർഗ്ഗങ്ങൾ ഏറെ ഫലപ്രദമാണ്. വിക്സ്, ജാതിക്ക, കർപ്പൂരം തുടങ്ങിയവ ഉപയോഗിച്ച് തയ്യാറാക്കുന്ന ഈ കൂട്ടുകൾ യാതൊരുവിധ പാർശ്വഫലങ്ങളും ഇല്ലാതെ മാസങ്ങളോളം ഉപയോഗിക്കാൻ സാധിക്കും. കെമിക്കലുകൾ അടങ്ങിയ കൊതുകുതിരികൾക്ക് പകരമായി കുട്ടികളും ശ്വാസകോശ രോഗികളുമുള്ള വീടുകളിൽ പോലും ഇവ ധൈര്യമായി ഉപയോഗിക്കാവുന്നതാണ്.
ഇതിനായി ജാതിക്കാക്കുരു നന്നായി പൊടിച്ച് അരിച്ചെടുക്കുകയാണ് ആദ്യ പടി. അരിച്ചെടുത്ത ശേഷം ബാക്കിവരുന്ന തരിതരിപ്പായ പൊടി ഒരു ടിഷ്യൂ പേപ്പറിലിട്ട് അതിലേക്ക് അര ടീസ്പൂൺ കാപ്പിപ്പൊടി കൂടി ചേർത്ത് നീളത്തിൽ ചുരുട്ടിയെടുക്കണം. സന്ധ്യാസമയത്തോ മഴക്കാലത്തോ ഈ ടിഷ്യൂ പേപ്പറിന്റെ രണ്ടറ്റവും കത്തിച്ച് പുകയ്ക്കുന്നത് വഴി കട്ടിലിനടിയിലും കർട്ടന് പിന്നിലും ഒളിച്ചിരിക്കുന്ന കൊതുകുകൾ കൂട്ടത്തോടെ ഇല്ലാതാകും. കൂടാതെ വീടിനുള്ളിലെ പൂപ്പൽ മണം മാറി നല്ലൊരു സുഗന്ധം പരക്കാനും ഇത് സഹായിക്കും.
കൂടുതൽ നാൾ നീണ്ടുനിൽക്കുന്ന മറ്റൊരു പ്രതിവിധിയാണ് വിക്സ് ഉപയോഗിച്ചുള്ള മെഴുകുതിരി. പഴയ മെഴുകുതിരി കഷ്ണങ്ങൾ ഉരുക്കി അതിലേക്ക് ഒരു ടീസ്പൂൺ വിക്സും രണ്ട് കട്ട കർപ്പൂരം പൊടിച്ചതും ചേർത്ത് യോജിപ്പിക്കുക. ഇത് ഒരു ചെറിയ പാത്രത്തിലോ ഗ്ലാസ് കുപ്പിയിലോ തിരിയിട്ട് ഒഴിച്ച് ഉറപ്പുകൂടിയ ശേഷം കത്തിച്ചുവെക്കാം. വിക്സിലെ മെന്തോളിന്റെയും കർപ്പൂരത്തിന്റെയും മണം കൊതുകുകളെ അകറ്റി നിർത്താൻ സഹായിക്കുന്നതിനൊപ്പം മഴക്കാലത്തുണ്ടാകുന്ന ജലദോഷം, ചുമ എന്നിവയ്ക്ക് ആശ്വാസം നൽകുകയും ചെയ്യും.
