കേരളത്തിന്റെ പുതിയ ആരോഗ്യമന്ത്രി കെ മുരളീധരൻ ആരോഗ്യവകുപ്പിൽ അടിമുടി മാറ്റങ്ങൾക്ക് തുടക്കം കുറിച്ചു. സ്ഥാനമേറ്റ് പത്ത് ദിവസത്തിനുള്ളിൽ തന്നെ സമഗ്ര പരിഷ്കരണത്തിനുള്ള നടപടികൾ സ്വീകരിച്ചു. തിരുവനന്തപുരം മെഡിക്കൽ കോളേജിനെ പരീക്ഷണശാലയായി തിരഞ്ഞെടുത്താണ് ആദ്യ ചുവടുകൾ.

മന്ത്രിയുടെ ആദ്യത്തെ ശരിയായ ചുവടുവയ്പ്പ്, തിരുവനന്തപുരം മെഡിക്കൽ കോളേജിലെ യൂറോളജി വിഭാഗം മേധാവി ഡോ. സുനിലിനെ പ്രൈവറ്റ് സെക്രട്ടറിയായി നിയമിച്ചതാണ്. 15 വർഷത്തെ പ്രവർത്തി പരിചയമുള്ള ഡോക്ടറുടെ പ്രായോഗിക ജ്ഞാനവും മന്ത്രിയുടെ രാഷ്ട്രീയ സീനിയോറിറ്റിയും ഇച്ഛാശക്തിയും ചേർന്ന് വലിയ മാറ്റത്തിന് തുടക്കമായി. ആശുപത്രികളിലെ അഴുക്കും ദുർഗന്ധവും ഇല്ലാതാക്കാൻ സംസ്ഥാന വ്യാപകമായി ശുചിത്വ ദിനാചരണവും ആരംഭിച്ചു.

ഒപി ക്യൂ സിസ്റ്റം പൊളിച്ചെഴുതിയതാണ് ഏറ്റവും വലിയ മാറ്റം. പുലർച്ചെ നാലുമണി മുതൽ മണിക്കൂറുകളോളം കാത്തുനിൽക്കേണ്ട സ്ഥിതിക്ക് പരിഹാരമായി. ടോക്കൺ, ഡോക്ടറെ കാണൽ, മരുന്ന് വാങ്ങൽ എന്നിവയ്ക്ക് വെവ്വേറെ ക്യൂ ഉണ്ടായിരുന്നത് ഒറ്റ ക്യൂവിലാക്കി. 80 വയസ്സു കഴിഞ്ഞവർക്കും ഭിന്നശേഷിക്കാർക്കും പ്രത്യേക പ്രയോറിറ്റി ക്യൂ ഏർപ്പെടുത്തി. ജോലി ചെയ്യാതെ യൂണിയൻ പ്രവർത്തനത്തിൽ മുഴുകിയ ജീവനക്കാരെ രോഗികളെ സഹായിക്കാനായി പുനർവിന്യസിച്ചു.

ഇൻപേഷ്യന്റുകളുടെ കാര്യത്തിലും വിപ്ലവകരമായ മാറ്റങ്ങൾ. ക്യാമ്പസിൽ ചിതറിക്കിടക്കുന്ന ലാബുകൾ ഒരൊറ്റ കേന്ദ്രത്തിലേക്ക് എത്തിക്കുന്നു. രാത്രി എട്ടുമണിക്ക് ശേഷം ടെസ്റ്റുകൾക്കായി രോഗിയുടെ കൂട്ടിരുപ്പുകാർ ഓടേണ്ടതില്ല; സാമ്പിളുകൾ ശേഖരിച്ച് ടെസ്റ്റ് നടത്താനുള്ള ഉത്തരവാദിത്വം ലാബ് ജീവനക്കാർക്ക് നൽകി. അയ്യായിരം രൂപ ശമ്പളം വാങ്ങി ഒരു ടെസ്റ്റ് പോലും നടത്താത്ത ലാബ് ടെക്നീഷ്യൻമാർക്കെതിരെ നടപടി ഉണ്ടാകും.

മുൻ സർക്കാരിന്റെ കാലത്ത് രോഗികളുടെ എണ്ണം പെരിപ്പിച്ചു കാണിക്കാൻ നടത്തിയ കള്ളത്തരങ്ങൾ അവസാനിപ്പിച്ചു. ഹൃദ്രോഗം, സ്ട്രോക്ക് തുടങ്ങിയ രോഗങ്ങൾക്ക് ഒരു മാസത്തെ മരുന്ന് മാത്രം നൽകി രോഗികളെ എല്ലാ മാസവും വരാൻ നിർബന്ധിച്ചിരുന്നത് ഒഴിവാക്കി. ഇനി രോഗി നേരിട്ട് വരണമെന്നില്ല; ബന്ധുക്കൾക്ക് കുറിപ്പടിയുമായി വന്ന് മരുന്ന് വാങ്ങാം. ഈ നടപടികൾ സാധാരണക്കാർക്ക് വലിയ ആശ്വാസമാകുമെന്നാണ് പ്രതീക്ഷ.