മുൻ കിഫ്ബി സിഇഒ കെ.എം. എബ്രഹാമിന്റെ കാലത്ത് നടന്ന ബന്ധുനിയമനങ്ങളെയും സാമ്പത്തിക ക്രമക്കേടുകളെയും കുറിച്ച് സമഗ്രമായ അന്വേഷണത്തിന് വി.ഡി. സതീശന്റെ നേതൃത്വത്തിലുള്ള സർക്കാർ ഉത്തരവിട്ടു. കിഫ്ബിയെ പൂർണ്ണമായും പുനസംഘടിപ്പിച്ച് ധനകാര്യ വകുപ്പിന്റെ നേരിട്ടുള്ള നിയന്ത്രണത്തിൽ കൊണ്ടുവരാനാണ് പുതിയ സർക്കാരിന്റെ തീരുമാനം. താൽക്കാലിക-കരാർ നിയമനങ്ങൾ പൂർണ്ണമായി ഒഴിവാക്കാനും ഇതിലൂടെ ലക്ഷ്യമിടുന്നു.

പിണറായി വിജയന്റെ വിശ്വസ്തനായിരുന്ന കെ.എം. എബ്രഹാമിന്റെ നേതൃത്വത്തിൽ കിഫ്ബി, കിഫ്കോൺ, കെ-ഡിസ്ക് എന്നീ സ്ഥാപനങ്ങൾ കേന്ദ്രീകരിച്ച് വൻ തോതിൽ സ്വജനപക്ഷപാതവും കുടുംബവാഴ്ചയും നടന്നതായാണ് ആക്ഷേപം. ഉയർന്ന ഉദ്യോഗസ്ഥരുടെ കുടുംബാംഗങ്ങൾക്കും ബന്ധുക്കൾക്കും യോഗ്യതയില്ലാതെ ലക്ഷങ്ങൾ ശമ്പളം വരുന്ന തസ്തികകളിൽ നിയമനം നൽകിയതിന്റെ ഫയലുകൾ പുറത്തുവന്നിട്ടുണ്ട്. നിലവിൽ ഒരു ലക്ഷം രൂപയ്ക്ക് മുകളിൽ ശമ്പളം വാങ്ങുന്ന അമ്പതോളം പേരുൾപ്പെടെ നാനൂറോളം കരാർ ജീവനക്കാരാണ് കിഫ്ബിയിലുള്ളത്. ഇവരുടെ നിയമന രീതികളെക്കുറിച്ച് വിശദമായ പരിശോധന നടക്കും.

Also read

തൃഷയുടെ അമ്മയ്ക്ക് മുന്നിൽ വിജയിന്റെ ഭാര്യ സംഗീത ചെയ്തത്; പഴയ വീഡിയോ വീണ്ടും ചർച്ചകളിൽ അംബാനിയെയും ചൈനീസ് കോടീശ്വരന്മാരെയും മറികടന്ന് ഗൗതം അദാനി വീണ്ടും ഏഷ്യയിലെ ഏറ്റവും വലിയ പണക്കാരൻ

ഭരണമാറ്റത്തിന് പിന്നാലെ കെ.എം. എബ്രഹാം സിഇഒ സ്ഥാനം രാജിവെച്ചതിനെ തുടർന്ന് നിലവിൽ അഡീഷണൽ ഡയറക്ടർ മിനി ആന്റണിക്കാണ് താൽക്കാലിക ചുമതല നൽകിയിരിക്കുന്നത്. ഇനിമുതൽ ധനവകുപ്പിലെ ജീവനക്കാരെയും യോഗ്യതയുള്ള സർക്കാർ ഉദ്യോഗസ്ഥരെയും മാത്രമേ കിഫ്ബിയിലേക്ക് നിയമിക്കൂ എന്ന് സർക്കാർ വ്യക്തമാക്കിയിട്ടുണ്ട്. കൂടാതെ, കിഫ്ബിയുടെ ഇതുവരെയുള്ള പ്രവർത്തനങ്ങൾ ഓഡിറ്റ് ചെയ്യാനും സംസ്ഥാനത്തിന്റെ ധനസ്ഥിതി വ്യക്തമാക്കുന്ന ധവളപത്രം പുറത്തിറക്കാനും പുതിയ ഭരണകൂടം തീരുമാനിച്ചിട്ടുണ്ട്.