കൊച്ചിയും ദുബായും കേന്ദ്രമായി പ്രവർത്തിച്ചിരുന്ന വൻ ലൈംഗിക മനുഷ്യക്കടത്ത് സംഘത്തെ പോലീസ് കണ്ടെത്തി. മോഡലിങ് വാഗ്ദാനം നൽകി യുവതികളെ ദുബായിലേക്ക് കടത്തി ലൈംഗിക ചൂഷണത്തിന് ഇരയാക്കിയ കേസിൽ മൂന്ന് സ്ത്രീകളെ അറസ്റ്റ് ചെയ്തു. നൂറോളം യുവതികൾ ഇവരുടെ വലയിൽ അകപ്പെട്ടിട്ടുണ്ടെന്നാണ് വിവരം.

ദുബായിൽ നിന്ന് രക്ഷപ്പെട്ടെത്തിയ ഒരു മോഡലും ബ്യൂട്ടീഷ്യനുമായ യുവതി മരട് പോലീസ് സ്റ്റേഷനിൽ നൽകിയ പരാതിയിലാണ് അന്വേഷണം ആരംഭിച്ചത്. തുടർന്ന് രണ്ട് യുവതികൾ കൂടി സമാന പരാതി നൽകി. ഇതിന്റെ അടിസ്ഥാനത്തിൽ തിരുവനന്തപുരം പൂജപ്പുര സ്വദേശി അലീന എബ്രഹാം (29), ഗുരുവായൂർ സ്വദേശി ടോയ്സി, പൊന്നാനി സ്വദേശി മഞ്ജിമ എന്നിവരെ മരടിലെ ഫ്ലാറ്റിൽ നിന്ന് അറസ്റ്റ് ചെയ്തു. നിലവിൽ ദുബായിലുള്ള രണ്ടുപേർ കൂടി ഇതിന്റെ ഭാഗമായി പോലീസിന് പിടികൂടാനുണ്ട്.

ദുബായിൽ ഫാഷൻ ഷോ നടക്കുന്നുവെന്നും തെരഞ്ഞെടുക്കപ്പെടുന്നവരെ ഫെബ്രുവരി ആദ്യം നടക്കുന്ന ഫാഷൻ ഷോയിൽ പങ്കെടുപ്പിക്കുമെന്നും കാണിച്ച് സമൂഹമാധ്യമങ്ങളിൽ പരസ്യം നൽകിയാണ് ഇവർ യുവതികളെ ആകർഷിച്ചിരുന്നത്. ദുബായിൽ എത്തിച്ച യുവതികളെ രഹസ്യ കേന്ദ്രങ്ങളിൽ താമസിപ്പിച്ചു. അവിടെ എത്തിയ ഉടൻ പാസ്പോർട്ടും മൊബൈൽ ഫോണുകളും ബലമായി പിടിച്ചെടുത്തു.

ശീതളപാനീയത്തിലും വെള്ളത്തിലും ലഹരി മരുന്ന് കലർത്തി നൽകി യുവതികളെ അബോധാവസ്ഥയിലാക്കി നിരവധി പുരുഷന്മാർക്ക് കാഴ്ചവെക്കുകയായിരുന്നു സംഘത്തിന്റെ രീതി. ഇതിന്റെ ദൃശ്യങ്ങൾ ചിത്രീകരിച്ച് വീട്ടുകാർക്ക് അയച്ചുകൊടുക്കുമെന്ന് ഭീഷണിപ്പെടുത്തിയും. ഭർത്താവ് കുപ്രസിദ്ധ ഗുണ്ടാ നായകൻ ഔറംഗസീബ് ആണെന്ന് പറഞ്ഞും അലീന ഇരകളെ ഭയപ്പെടുത്തിയിരുന്നു.

ആദ്യ പരാതിക്കാരിയുടെ വാക്കുകളിൽ, ഫ്ലാറ്റിൽ എത്തുമ്പോൾ അവിടെ മറ്റ് എട്ട് യുവതികൾ കൂടി ഉണ്ടായിരുന്നു. മോഡലിങ് സ്വപ്നം കണ്ടാണ് അവരത് ദുബായിൽ എത്തിയത്. വീട്ടമ്മമാർ ഉൾപ്പെടെയുള്ളവരെ ജോലി വാഗ്ദാനം ചെയ്തും ഈ സംഘം ദുബായിൽ എത്തിച്ചിരുന്നു.

അലീനക്ക് മുൻപും ക്രിമിനൽ പശ്ചാത്തലമുണ്ട്. കഴിഞ്ഞ നവംബറിൽ വൈറ്റിലയിലെ ഒരു ബാറിൽ വെച്ച് അലീന ഉൾപ്പെട്ട സംഘം വടിവാളുമായി ആക്രമണം നടത്തിയിരുന്നു. ആ കേസിൽ അലീന രണ്ടാം പ്രതിയാണ്.

അലീനയുടെ പിന്നിൽ വൻ അധോലോക ബന്ധങ്ങളും ജയിൽ വകുപ്പിലെ ചില ഉദ്യോഗസ്ഥരുടെ പിന്തുണയും ഉണ്ടെന്നതിന്റെ തെളിവുകൾ പുറത്തുവന്നു. നെയ്യാറ്റിൻകരയ്ക്കടുത്ത് വെച്ച് നടന്ന അലീനയുടെ സഹോദരിയുടെ വിവാഹച്ചടങ്ങിൽ ഒരു മുതിർന്ന ജയിൽ ഉദ്യോഗസ്ഥൻ വിഐപിയായി പങ്കെടുത്തത് ഇതിന് ഉദാഹരണമാണ്.

ഇപ്പോഴും ഒരുപാട് യുവതികൾ ദുബായിൽ കുടുങ്ങിക്കിടക്കുന്നുണ്ടെന്നാണ് വിവരം. അവരെ രക്ഷപ്പെടുത്താനുള്ള ശ്രമത്തിലാണ് പോലീസ്. മനുഷ്യക്കടത്ത് കേസായാണ് പോലീസ് കേസ് രജിസ്റ്റർ ചെയ്തിരിക്കുന്നത്.