കൊല്ലം വെക്ടർ കൺട്രോൾ യൂണിറ്റ് വാഹനം കട്ടപ്പുറത്ത്; ഇൻഷുറൻസ് തീർന്നിട്ട് മൂന്ന് മാസം
കൊല്ലം വെക്ടർ കൺട്രോൾ യൂണിറ്റിന് എം.എൽ.എ മുകേഷ് തന്റെ ആസ്തി വികസന ഫണ്ടിൽ നിന്നും നൽകിയ വാഹനം ഇൻഷുറൻസ് കാലാവധി കഴിഞ്ഞതിനെ തുടർന്ന് കഴിഞ്ഞ മൂന്ന് മാസമായി കട്ടപ്പുറത്ത്. ജില്ലയിലെ പകർച്ചവ്യാധി പ്രതിരോധ പ്രവർത്തനങ്ങളെയും കൊതുക് ഉൾപ്പെടെയുള്ള പ്രാണികൾ പരത്തുന്ന രോഗങ്ങളുടെ നിരീക്ഷണത്തെയും ഈ അനാസ്ഥ ഗുരുതരമായി ബാധിച്ചിരിക്കുകയാണ്.
മന്ത്, മലമ്പനി, ഡെങ്കിപ്പനി, ജപ്പാൻ ജ്വരം, ചിക്കൻകുനിയ തുടങ്ങിയ മാരകമായ രോഗങ്ങൾ പടരുന്നത് തടയാൻ രൂപീകരിച്ചതാണ് വെക്ടർ കൺട്രോൾ യൂണിറ്റ്. പത്തുമുതൽ ഇരുപത്തിയഞ്ചോളം വരുന്ന ആരോഗ്യവകുപ്പ് ജീവനക്കാർക്ക് ഒന്നിച്ച് വിവിധ പ്രദേശങ്ങളിൽ പോയി രക്തപരിശോധനയും ബോധവൽക്കരണവും നടത്താൻ ഈ വാഹനം അത്യാവശ്യമാണ്. എന്നാൽ വാഹനം ഓടിക്കാൻ കഴിയാത്ത സാഹചര്യത്തിൽ ജീവനക്കാർക്ക് കൃത്യമായി ഫീൽഡ് ജോലികൾ ചെയ്യാൻ സാധിക്കുന്നില്ല.
ആരോഗ്യവകുപ്പിന് കീഴിലുള്ള ഈ യൂണിറ്റിന്റെ ചുമതല നിലവിൽ ഒരു ബയോളജിസ്റ്റിനാണ്. മുൻ ആരോഗ്യ മന്ത്രിയുടെയും സർക്കാരിന്റെയും കാലത്തുണ്ടായ ഈ കെടുകാര്യസ്ഥത പുതിയ സർക്കാർ അടിയന്തരമായി ഇടപെട്ട് പരിഹരിക്കുമെന്നാണ് നാട്ടുകാരുടെ പ്രതീക്ഷ. സർക്കാർ ജീവനക്കാരായതിനാൽ ഇവിടുത്തെ ഉദ്യോഗസ്ഥർ ഈ വിഷയത്തിൽ പരസ്യമായി പ്രതികരിക്കാൻ മടിക്കുകയാണെന്നും റിപ്പോർട്ടുകൾ സൂചിപ്പിക്കുന്നു.
