എൽപിജി ഉപഭോക്താക്കൾ ശ്രദ്ധിക്കുക: ജൂൺ മുതൽ പുതിയ നിയമങ്ങൾ, കണക്ഷൻ റദ്ദാകാൻ സാധ്യത
രാജ്യത്തെ കോടിക്കണക്കിന് വരുന്ന പാചകവാതക ഉപഭോക്താക്കളെ നേരിട്ട് ബാധിക്കുന്ന പുതിയ പരിഷ്കാരങ്ങളുമായി എണ്ണക്കമ്പനികളും പെട്രോളിയം മന്ത്രാലയവും രംഗത്ത്. ഇന്ത്യൻ, ഭാരത് ഗ്യാസ്, എച്ച്പി ഗ്യാസ് തുടങ്ങിയ പ്രമുഖ ബ്രാൻഡുകളുടെ ഉപയോഗത്തിലും ബുക്കിങ്ങിലും വരുത്തിയിരിക്കുന്ന ഈ മാറ്റങ്ങൾ കൃത്യമായി മനസ്സിലാക്കിയില്ലെങ്കിൽ കണക്ഷൻ തന്നെ റദ്ദാക്കപ്പെടുന്ന അവസ്ഥയുണ്ടാകും. അന്താരാഷ്ട്ര വിപണിയിലെ പ്രതിസന്ധികൾ മറികടക്കാനും വിതരണം സുഗമമാക്കാനുമാണ് സർക്കാർ ഈ കർശന നടപടികളിലേക്ക് കടന്നിരിക്കുന്നത്.
സിലിണ്ടർ റീഫിൽ ചെയ്യുന്നതിനുള്ള സമയപരിധി മാറ്റി നിശ്ചയിച്ചു എന്ന തരത്തിൽ സോഷ്യൽ മീഡിയയിൽ പ്രചരിച്ച വാർത്തകൾ അടിസ്ഥാനരഹിതമാണെന്ന് മന്ത്രാലയം വ്യക്തമാക്കിയിട്ടുണ്ട്. ഗ്രാമീണ മേഖലകളിലെ 25 ദിവസത്തെ പരിധിയും നഗരങ്ങളിലെ 45 ദിവസത്തെ നിയന്ത്രണവും യാതൊരു മാറ്റവുമില്ലാതെ തുടരും. എന്നാൽ, പൈപ്പ്ഡ് നാച്ചുറൽ ഗ്യാസ് (PNG) സൗകര്യമുള്ള പ്രദേശങ്ങളിൽ എൽപിജി കണക്ഷനുകൾ നിർത്തലാക്കാനുള്ള തീരുമാനം കർശനമാക്കിയിട്ടുണ്ട്. പിഎൻജി പൈപ്പ്ലൈൻ സൗകര്യമുണ്ടായിട്ടും എൽപിജി സിലിണ്ടറുകൾ കൈവശം വെക്കുന്നത് തുടർന്നാൽ കണക്ഷനുകൾ യാന്ത്രികമായി റദ്ദാക്കപ്പെടും.
ഒരു വീട്ടിൽ ഒരു പാചകവാതക കണക്ഷൻ മാത്രം അനുവദിക്കുന്ന നയമാണ് കമ്പനികൾ ഇപ്പോൾ നടപ്പിലാക്കുന്നത്. ഒരേ മേൽവിലാസത്തിൽ എൽപിജിയും പിഎൻജിയും ഒരുമിച്ച് ഉപയോഗിക്കുന്നത് തടയാൻ പരിശോധനകൾ ആരംഭിച്ചു കഴിഞ്ഞു. കൂടാതെ, വിതരണത്തിലെ സുതാര്യത ഉറപ്പാക്കാൻ ജൂൺ മുതൽ ഒടിപി (OTP) അധിഷ്ഠിത ഡെലിവറി സംവിധാനം പൂർണ്ണമായും നിർബന്ധമാക്കിയിട്ടുണ്ട്. രജിസ്റ്റർ ചെയ്ത മൊബൈൽ നമ്പറിലേക്ക് വരുന്ന ഒടിപി കൈമാറിയാൽ മാത്രമേ ഇനി മുതൽ സിലിണ്ടർ ലഭിക്കുകയുള്ളൂ.
