ഒ.ജെ.ജനീഷ് യുഡിഎഫ് സർക്കാരിൽ മന്ത്രിയായതോടെ അദ്ദേഹത്തിന്റെ ഔദ്യോഗിക വാഹനത്തിന് ലഭിച്ച നമ്പർ 10 ആണ്. ക്രിക്കറ്റിൽ സച്ചിൻ തെണ്ടുൽക്കറും ഫുട്ബോളിൽ മെസ്സിയും ജേഴ്സിയിൽ പതിച്ച നമ്പറാണ് 10. ഇത് താൻ ശ്രദ്ധിച്ചിരുന്നില്ല എന്നാണ് അദ്ദേഹം പറയുന്നത്.

പുതിയ മന്ത്രിമാർക്ക് പുതിയ വാഹനങ്ങൾ നൽകിയിട്ടില്ല. കഴിഞ്ഞ എൽഡിഎഫ് സർക്കാരിലെ മന്ത്രിമാർ ഉപയോഗിച്ചിരുന്ന വാഹനങ്ങളാണ് നൽകിയിരിക്കുന്നത്. പിണറായി വിജയൻ മുഖ്യമന്ത്രിയായിരിക്കെ ഉപയോഗിച്ചിരുന്ന കറുത്ത കാറുകൾ നിലവിലെ മന്ത്രിമാരിൽ ആർക്കും നൽകിയിട്ടില്ല.

മൻമോഹൻ ബംഗ്ലാവാണ് ജനീഷ് തിരഞ്ഞെടുത്ത ഔദ്യോഗിക വസതി. തിരുവിതാംകൂർ രാജാവായിരുന്ന ശ്രീമൂലം തിരുനാൾ പണികഴിപ്പിച്ച ഈ ബംഗ്ലാവിന് ചരിത്രത്തിൽ വലിയ സ്ഥാനമുണ്ട്. ഇവിടെ താമസിക്കുന്ന മന്ത്രിമാർക്ക് രാഷ്ട്രീയ തിരിച്ചടികൾ നേരിടേണ്ടി വരുമെന്ന അന്ധവിശ്വാസത്തെ തള്ളിയാണ് ജനീഷ് ഈ വസതി തിരഞ്ഞെടുത്തത്.

കോടിയേരി ബാലകൃഷ്ണൻ, ടിയു കുരുവിള, മോൺസ് ജോസഫ് എന്നിവർക്ക് ഈ വസതിയിൽ താമസിച്ചതിന് ശേഷം രാഷ്ട്രീയ പ്രതിസന്ധികൾ നേരിടേണ്ടി വന്നിരുന്നു. എങ്കിലും ഉമ്മൻചാണ്ടി സർക്കാരിന്റെ കാലത്ത് ആര്യാടൻ മുഹമ്മദും ഒന്നാം പിണറായി സർക്കാരിന്റെ കാലത്ത് ഡോ. ടി എം തോമസ് ഐസക്കും അഞ്ചു വർഷം പൂർത്തിയാക്കിയത് ഇവിടെ താമസിച്ചു തന്നെയാണ്.

കൊടുങ്ങല്ലൂർ മണ്ഡലത്തിൽ നിന്ന് വൻ ഭൂരിപക്ഷത്തിൽ വിജയിച്ച ജനീഷിന്റെ ജീവിതകഥ തന്നെ പ്രചാരണത്തിനിടെ ഏറെ ശ്രദ്ധ നേടിയിരുന്നു. കനത്ത വെയിലിലും ചുഴിയിലും ജോലി ചെയ്യുന്ന അമ്മമാരെ കണ്ടാൽ പ്രചാരണ വാഹനം നിർത്തി അവർക്കരികിൽ എത്തുമായിരുന്നു അദ്ദേഹം. കൊടുങ്ങല്ലൂരിലെ അദ്ദേഹത്തിന്റെ ഭൂരിപക്ഷം 8308 ആണ്, അത് കൂട്ടിച്ചേർത്താൽ 10 എന്ന സംഖ്യയും ലഭിക്കും.

അതേസമയം, സിൽവർ ലൈൻ അതിവേഗ റെയിൽ പദ്ധതി റദ്ദാക്കിയതായി മുഖ്യമന്ത്രി വിഡി സതീശൻ അറിയിച്ചു. പദ്ധതിയുമായി ബന്ധപ്പെട്ട എല്ലാ വിജ്ഞാപനങ്ങളും റദ്ദാക്കിയിട്ടുണ്ടെന്നും ഭൂമി ഏറ്റെടുക്കൽ തീരുമാനവും റദ്ദാക്കിയിട്ടുണ്ടെന്നും അദ്ദേഹം വ്യക്തമാക്കി.