പാർട്ടിയിൽ നിന്ന് പുറത്താക്കപ്പെട്ട കോൺഗ്രസ് നേതാവ് രാഹുൽ മാങ്കൂട്ടത്തിൽ നവകേരള സദസ്സിലെ ആക്രമണക്കേസ് അന്വേഷിക്കാനായി രൂപീകരിച്ച എസ്ഐടിയെ പരിഹസിച്ച് രംഗത്ത്. ഫേസ്ബുക്കിൽ പങ്കുവെച്ച പോസ്റ്റിൽ ഏത് ഷൗക്കത്തലിയെയാണ് അന്വേഷണ ചുമതല ഏൽപ്പിച്ചതെന്ന് അദ്ദേഹം ചോദിച്ചു.

യുഡിഎഫ് സർക്കാരിന്റെ ആദ്യ മന്ത്രിസഭാ യോഗത്തിലാണ് എസ്ഐടി രൂപീകരിച്ച് പുനരന്വേഷണത്തിന് ഉത്തരവിട്ടത്. ആലപ്പുഴ ക്രൈം ബ്രാഞ്ച് എസ്പി ഷൗക്കത്തലിയുടെ മേൽനോട്ടത്തിൽ ബൈജു പൗലോസ് അന്വേഷണ ഉദ്യോഗസ്ഥനായി പ്രവർത്തിക്കും. ഒരു മാസത്തിനകം അന്വേഷണം പൂർത്തിയാക്കാനും 15 ദിവസത്തിനകം പുരോഗതി റിപ്പോർട്ട് സമർപ്പിക്കാനും നിർദ്ദേശിച്ചിട്ടുണ്ട്.

മുടക്കോഴി മലയിൽ നിന്ന് കൊടിസുനിയെയും സിപിഎം ക്രിമിനൽ സംഘത്തെയും പിടികൂടിയ ഡിവൈഎസ്പി ഷൗക്കത്തലിയെയാണ് രാഹുൽ ഓർമ്മിപ്പിച്ചത്. ആ നടപടിയുടെ പേരിൽ പിണറായി സർക്കാർ 10 വർഷം അദ്ദേഹത്തെ ദ്രോഹിച്ചുവെന്നും രാഹുൽ കുറ്റപ്പെടുത്തി.

“ഏത് ഷൗക്കത് അലി? മുടക്കോഴി മലയിൽ പോയി ടിപിയെ കൊന്ന കൊടിസുനിയെയും സിപിഎം ക്രിമിനൽ സംഘത്തെയും പിടികൂടിയ ഷൗക്കത് അലി, അതിന്റെ പേരിൽ വിജയൻ സർക്കാർ 10 വർഷം ദ്രോഹിച്ച ഷൗക്കത് അലി?” രാഹുൽ ചോദിച്ചു.

2023 ഡിസംബറിൽ നവകേരള സദസ്സിനിടെ ആലപ്പുഴയിൽ വച്ച് പ്രതിഷേധിച്ച യൂത്ത് കോൺഗ്രസ് പ്രവർത്തകരെ അന്നത്തെ മുഖ്യമന്ത്രി പിണറായി വിജയന്റെ സുരക്ഷാ ഉദ്യോഗസ്ഥർ മർദ്ദിച്ച സംഭവത്തിനാണ് പുനരന്വേഷണം. കോടതി ഉത്തരവിട്ടിട്ടും ഒന്നര വർഷത്തോളം എൽഡിഎഫ് സർക്കാർ പുനരന്വേഷണത്തിന് തയ്യാറായിരുന്നില്ല. യുഡിഎഫ് സർക്കാർ അധികാരമേറ്റ ഉടൻ എടുത്ത നിർണായക തീരുമാനമാണിത്.

പാർട്ടിയിൽ നിന്ന് പുറത്തായിട്ടും രാഹുൽ മാങ്കൂട്ടത്തിൽ രാഷ്ട്രീയ വിഷയങ്ങളിൽ സജീവമായി തുടരുന്നു. അദ്ദേഹത്തെ പാർട്ടിയിലേക്ക് തിരിച്ചെടുക്കണമെന്ന ആവശ്യവും സോഷ്യൽ മീഡിയയിൽ ഉയരുന്നുണ്ട്.