പ്രിയദർശിനി പദ്ധതിയെ സ്വാഗതം ചെയ്ത് സുരേഷ് ഗോപി; സാമ്പത്തിക ശേഷിയുള്ളവർ സൗജന്യ യാത്ര ഒഴിവാക്കണമെന്ന് നിർദേശം
സ്ത്രീകൾക്കായുള്ള സൗജന്യ യാത്രാ പദ്ധതിയായ പ്രിയദർശിനിയെ സ്വാഗതം ചെയ്ത് കേന്ദ്രമന്ത്രി സുരേഷ് ഗോപി. ഇതൊരു മികച്ച പദ്ധതിയാണെന്ന് വ്യക്തമാക്കിയ അദ്ദേഹം, സാമ്പത്തിക ശേഷിയുള്ള സ്ത്രീകൾ സൗജന്യ യാത്രയിൽ നിന്ന് സ്വമേധയാ ഒഴിവായാൽ ഈ പദ്ധതി വലിയ വിജയമായി മാറുമെന്നും അഭിപ്രായപ്പെട്ടു. യാത്ര ചെയ്യാൻ പണമില്ലാതെ ബുദ്ധിമുട്ടിയിരുന്ന സാധാരണക്കാരായ സ്ത്രീകൾക്ക് പുതിയ പ്രതീക്ഷകൾ നൽകുന്നതാണ് ഈ മാതൃകാപരമായ തീരുമാനം.
പ്രധാനമന്ത്രിയുടെ പാചകവാതക സബ്സിഡി ഉപേക്ഷിക്കാനുള്ള ‘ഗിവ് ഇറ്റ് അപ്പ്’ പദ്ധതിക്ക് സമാനമായി, സാമ്പത്തികമായി സുരക്ഷിതരായ സ്ത്രീകൾ തങ്ങൾക്ക് ഇതിന്റെ ആവശ്യമില്ലെന്ന് പറഞ്ഞ് ടിക്കറ്റെടുത്ത് യാത്ര ചെയ്യാൻ തയ്യാറാകണമെന്ന് അദ്ദേഹം നിർദ്ദേശിച്ചു. അർഹതപ്പെട്ട മറ്റൊരു നിർദ്ധനയായ സ്ത്രീയുടെ അവകാശം താൻ കവർന്നെടുക്കില്ലെന്ന ചിന്താഗതി സ്ത്രീകളിൽ വളർന്നുവന്നാൽ അത് പദ്ധതിയെ കൂടുതൽ ജനകീയമാക്കും. കാസർകോട്ടെ ഒരു വീട്ടമ്മയുടെ പ്രതികരണം ഉദ്ധരിച്ചുകൊണ്ട്, ഈ പദ്ധതി സ്ത്രീകളുടെ മുഖത്ത് വലിയ സന്തോഷമാണ് നൽകുന്നതെന്നും അദ്ദേഹം കൂട്ടിച്ചേർത്തു.
കെഎസ്ആർടിസിയുടെ സാമ്പത്തിക അടിത്തറ ശക്തിപ്പെടുത്തുന്നതിനെക്കുറിച്ചും സുരേഷ് ഗോപി സംസാരിച്ചു. പ്ലാനിംഗ് കമ്മീഷൻ അംഗമായിരുന്ന സി.പി. ജോണിന്റെ സാമ്പത്തിക വൈദഗ്ധ്യത്തെയും മുഖ്യമന്ത്രിയുടെയും സർക്കാരിന്റെയും ശ്രമങ്ങളെയും അദ്ദേഹം പരാമർശിച്ചു. ട്രേഡ് യൂണിയൻ രാഷ്ട്രീയ ഇടപെടലുകൾക്ക് അതീതമായി ജനങ്ങൾക്ക് മികച്ച സേവനം നൽകാൻ എല്ലാവരും ഒരുമിച്ച് നിൽക്കണമെന്നും, പ്രതിപക്ഷം വെറുതെ എതിർക്കാതെ സർക്കാരിന്റെ നല്ല കാര്യങ്ങളെ പിന്തുണയ്ക്കുകയും തെറ്റുകൾ തിരുത്താൻ സഹായിക്കുകയും ചെയ്യുന്ന പോസിറ്റീവ് രാഷ്ട്രീയം വളർത്തിയെടുക്കണമെന്നും കേന്ദ്രമന്ത്രി ആവശ്യപ്പെട്ടു.
