ഒന്നര വയസ്സുകാരിയുടെ മരണം: ദുരൂഹത ആരോപിച്ച് നാട്ടുകാർ രംഗത്ത്
ഒന്നര വയസ്സ് മാത്രം പ്രായമുള്ള കുഞ്ഞിന്റെ മരണത്തിൽ ക്രൂരമായ കൊലപാതകവും ദുരൂഹതയും ആരോപിച്ച് നാട്ടുകാർ രംഗത്ത്. കുഞ്ഞിന് ചോറ് കൊടുത്തപ്പോൾ തൊണ്ടയിൽ കുടുങ്ങിയതാണെന്ന വീട്ടുകാരുടെ വാദം കള്ളമാണെന്നും, ആശുപത്രിയിൽ കൊണ്ടുപോകുന്നതിന് മുൻപ് തന്നെ കുഞ്ഞ് മരണപ്പെട്ടിരുന്നുവെന്നും പ്രദേശവാസികൾ സാക്ഷ്യപ്പെടുത്തുന്നു.
സംഭവദിവസം വീട്ടിലേക്ക് ആംബുലൻസ് പാഞ്ഞെത്തിയതും, കുഞ്ഞിനെ തോളിലിട്ട് ഒരാൾ ഓടി വണ്ടിയിൽ കയറ്റിക്കൊണ്ടുപോയതും തങ്ങൾ നേരിട്ട് കണ്ടതാണെന്ന് അയൽവാസികൾ പറയുന്നു. ആ സമയത്ത് തന്നെ കുഞ്ഞ് പൂർണ്ണമായും തളർന്നുപോയിരുന്നുവെന്നും ശ്വാസമെടുക്കുന്നുണ്ടായിരുന്നില്ലെന്നും അവർ വ്യക്തമാക്കുന്നു. കുഞ്ഞിന്റെ കൈകളിൽ പരിക്കുകൾ ഉണ്ടായിരുന്നുവെന്നും, കരച്ചിൽ പുറത്തുകേൾക്കാതിരിക്കാൻ വായ ഒട്ടിച്ചുവെച്ചിരിക്കാമെന്നും നാട്ടുകാർ സംശയിക്കുന്നു.
ഏതാനും മാസങ്ങൾക്ക് മുൻപ് മാത്രം ഇവിടെ താമസിക്കാൻ എത്തിയവരാണ് ഈ കുടുംബം. നാട്ടുകാരുമായി യാതൊരു സമ്പർക്കവും ഇല്ലാതിരുന്ന ഇവർ ലഹരിക്ക് അടിമകളായിരുന്നുവെന്നാണ് പ്രദേശവാസികൾ ആരോപിക്കുന്നത്. കുഞ്ഞിന്റെ അമ്മയ്ക്കും കൂടെയുണ്ടായിരുന്നവർക്കും ഈ ദാരുണ സംഭവത്തിൽ പങ്കുണ്ടെന്നും ഇവർക്കെതിരെ കർശന പോലീസ് അന്വേഷണം വേണമെന്നും നാട്ടുകാർ ആവശ്യപ്പെടുന്നു.
