യുഡിഎഫ് മന്ത്രിമാരുടെ പേഴ്സണൽ സ്റ്റാഫ് നിയമനങ്ങളെച്ചൊല്ലി കോൺഗ്രസിനുള്ളിൽ വൻ പ്രതിഷേധവും തർക്കവും പുകയുന്നു. കഴിഞ്ഞ ഒരു പതിറ്റാണ്ടുകാലം പാർട്ടിക്കായി തെരുവിൽ വിയർപ്പൊഴുക്കിയ സാധാരണക്കാരായ പ്രവർത്തകരെ പൂർണ്ണമായും അവഗണിച്ച്, മന്ത്രിമാരുടെ ബന്ധുക്കളെയും സ്വന്തക്കാരെയും പേഴ്സണൽ സ്റ്റാഫിൽ തിരുകിക്കയറ്റുന്നു എന്നാണ് പ്രധാന ആക്ഷേപം.

വൈദ്യുതി മന്ത്രിയും കെപിസിസി അധ്യക്ഷനുമായ സണ്ണി ജോസഫ് തന്റെ സ്വന്തം സഹോദരി ഭർത്താവും കണ്ണൂർ സ്വദേശിയുമായ ബെന്നി തോമസിനെ അഡീഷണൽ പ്രൈവറ്റ് സെക്രട്ടറിയായി നിയമിച്ചതാണ് നിലവിലെ പ്രധാന വിവാദം. മുൻ എൽഡിഎഫ് സർക്കാരിന്റെ ബന്ധുനിയമനങ്ങൾക്കെതിരെ അതിശക്തമായി രംഗത്തുവന്ന യുഡിഎഫ് നേതൃത്വം ഇപ്പോൾ അതേ വഴിയിലൂടെ സഞ്ചരിക്കുന്നത് വലിയ വിമർശനങ്ങൾക്ക് വഴിവെച്ചിട്ടുണ്ട്. നാലുവർഷം സർവീസിൽ തുടർന്നാൽ ആജീവനാന്ത പെൻഷൻ ലഭിക്കുന്ന ഇത്തരം തസ്തികകളിലേക്ക് സ്വന്തക്കാരെ തിരുകിക്കയറ്റാൻ വലിയ മത്സരമാണ് നടക്കുന്നത്.

Also read

തൃഷയുടെ അമ്മയ്ക്ക് മുന്നിൽ വിജയിന്റെ ഭാര്യ സംഗീത ചെയ്തത്; പഴയ വീഡിയോ വീണ്ടും ചർച്ചകളിൽ അംബാനിയെയും ചൈനീസ് കോടീശ്വരന്മാരെയും മറികടന്ന് ഗൗതം അദാനി വീണ്ടും ഏഷ്യയിലെ ഏറ്റവും വലിയ പണക്കാരൻ

മുസ്ലിം ലീഗ് അയ്യായിരത്തോളം അപേക്ഷകളിൽ നിന്ന് 150 പേരെ ഷോർട്ട്‌ലിസ്റ്റ് ചെയ്ത് താരതമ്യേന സുതാര്യമായ രീതിയിലാണ് നിയമനം നടത്തിയതെങ്കിലും പികെ കുഞ്ഞാലിക്കുട്ടിക്ക് വേണ്ടി പ്രത്യേക ഇളവുകൾ നൽകിയിട്ടുണ്ട്. അതേസമയം ജലസേചന മന്ത്രി മോൻസ് ജോസഫ് വിരമിച്ച ഐഎഎസ് ഉദ്യോഗസ്ഥനായ എ. അലക്സാണ്ടറെ പ്രൈവറ്റ് സെക്രട്ടറിയായും, ഗതാഗത മന്ത്രി സി.പി. ജോൺ, കൃഷിമന്ത്രി ടി. സിദ്ദിഖ്, ആരോഗ്യ മന്ത്രി കെ. മുരളീധരൻ എന്നിവർ തങ്ങളുടെ സ്റ്റാഫുകളെയും നിയമിച്ചിട്ടുണ്ട്. എന്നാൽ മന്ത്രിമാർക്കിടയിൽ കൃത്യമായ ഏകോപനമില്ലാത്തതും കെപിസിസി ഓഫീസ് നാഥനില്ലാ കളരിയായി തുടരുന്നതും സാധാരണ പ്രവർത്തകരിൽ കടുത്ത നിരാശയാണ് ഉണ്ടാക്കുന്നത്.