തിരുവനന്തപുരം-കാസർഗോഡ് സിൽവർ ലൈൻ പദ്ധതി ഉപേക്ഷിച്ചതിനു പകരം അതിവേഗ റെയിൽ ഇടനാഴി നടപ്പാക്കാൻ മുഖ്യമന്ത്രി വിഡി സതീശന്റെ നേതൃത്വത്തിലുള്ള യുഡിഎഫ് സർക്കാർ ശ്രമിക്കും. വന്ദേ ഭാരത അടക്കം മറ്റു ട്രെയിനുകൾക്കും ചരക്ക് നീക്കത്തിനും സഞ്ചരിക്കാനാവുന്ന തരത്തിൽ ബ്രോഡ് ഗേജ് പാതയാണ് ലക്ഷ്യം. മെട്രോമാൻ ഈ ശ്രീധരന്റെ സഹായം തേടിയിട്ടാവും റെയിൽവേ മന്ത്രാലയത്തെ സമീപിക്കുക.

ബ്രോഡ് ഗേജിൽ സിൽവർ ലൈനിൽ പ്രഖ്യാപിച്ച 200 കിലോമീറ്റർ വേഗം കിട്ടില്ല. ബ്രോഡ് ഗേജിലെ പരമാവധി വേഗമായ 160 കിലോമീറ്റർ ട്രെയിൻ ഓടിക്കാവുന്ന തരത്തിൽ വളവുകൾ കുറഞ്ഞ പാതയ്ക്കായിരിക്കും ശ്രമം. ജനങ്ങൾക്ക് ദുരിതമാവാത്ത രീതിയിൽ വളരെ കുറച്ച് ഭൂമി മാത്രം ഏറ്റെടുത്ത് തൂണുകളിലായിരിക്കും പാത നിർമിക്കുക. യാഥാർത്ഥ്യമായാൽ തിരുവനന്തപുരം കാസർഗോഡ് 580 കിലോമീറ്റർ ദൂരം നാലര മണിക്കൂറിൽ എത്താം.

റെയിൽ പാതയുമായി ബന്ധമില്ലാത്ത സ്റ്റാൻഡേർഡ് ഗേജിലാണ് സിൽവർ ലൈൻ വിഭാവനം ചെയ്തിരുന്നത്. ബ്രോഡ് ഗേജിൽ ആക്കണമെന്ന റെയിൽവേയുടെ നിർദ്ദേശം കഴിഞ്ഞ എൽഡിഎഫ് സർക്കാർ തള്ളിയിരുന്നു. ഇപ്പോൾ റെയിൽവേ നയത്തിന് അനുസൃതമായി പുതിയ പദ്ധതിക്കാണ് ശ്രമം. നിലവിലെ റെയിൽ പാതയുമായി ഓരോ 50 കിലോമീറ്ററിലും കണക്ഷനോടെ അതിവേഗ ഇടനാഴി വന്നാൽ യാത്രക്കാർക്ക് കൂടുതൽ ഗുണകരമാകും.

കേരളത്തിലെ ഏറ്റവും വിവാദപരമായ ഇൻഫ്രാസ്ട്രക്ചർ പദ്ധതിയായിരുന്നു കേറ (കേരള റെയിൽ ഡെവലപ്മെന്റ് കോർപ്പറേഷൻ) യുടെ സിൽവർ ലൈൻ. പദ്ധതിക്കെതിരെ ശക്തമായ ജനകീയ പ്രക്ഷോഭം ഉണ്ടായി. 6,700 ലധികം മഞ്ഞക്കുറ്റികളാണ് കേറ കമ്പനി സ്ഥാപിച്ചത്. പലയിടത്തും വീടുകൾക്കുള്ളിലും അടുക്കളകളിലും വരെ ഈ കുറ്റികൾ സ്ഥാപിച്ചത് വൻ പ്രതിഷേധത്തിന് ഇടയാക്കി.

കഴിഞ്ഞ തിരഞ്ഞെടുപ്പിൽ സിൽവർ ലൈൻ റദ്ദാക്കുമെന്ന യുഡിഎഫിന്റെ വാഗ്ദാനം പാലിച്ചാണ് വിഡി സതീശൻ സർക്കാർ അധികാരത്തിൽ വന്നതിന് പിന്നാലെ തന്നെ പദ്ധതി ഉപേക്ഷിച്ചത്. രണ്ടാം മന്ത്രിസഭാ യോഗത്തിൽ തന്നെ പദ്ധതി വേണ്ടെന്ന് വച്ചു. പ്രതിഷേധിച്ചവരുടെ പേരിലെടുത്ത ആയിരത്തിലധികം കേസുകൾ പിൻവലിക്കാനും തീരുമാനിച്ചു.

ഭൂമി കൈമാറ്റം ചെയ്യാനോ ബാങ്ക് വായ്പയ്ക്ക് ഈടുവയ്ക്കാനോ കഴിയാതെ വർഷങ്ങളായി ദുരിതമനുഭവിച്ച ആയിരക്കണക്കിന് കുടുംബങ്ങൾ ആശ്വാസത്തോടെയാണ് തീരുമാനത്തെ സ്വാഗതം ചെയ്തത്. കേറയിൽ പദ്ധതിയുമായി ബന്ധപ്പെട്ട ഭൂമി ഏറ്റെടുക്കൽ വിജ്ഞാപനം റദ്ദാക്കിയ വിവരം ഉടമകളെ ഔദ്യോഗികമായി അറിയിക്കുമെന്ന് റവന്യൂ മന്ത്രി എപി അനിൽകുമാർ അറിയിച്ചു. അതിവേഗ പാതയ്ക്കൊപ്പം വിഴിഞ്ഞം തുറമുഖത്തു നിന്നുള്ള ചരക്ക് നീക്കത്തിനായി റോ-റോ സംവിധാനവും ആസൂത്രണം ചെയ്യുന്നുണ്ട്.