നവകേരള സദസ്സിനിടെ യൂത്ത് കോൺഗ്രസ്, കെഎസ്യു പ്രവർത്തകരെ മർദ്ദിച്ച കേസിൽ എഡിജിപി എം.ആർ. അജിത് കുമാറിന് തിരിച്ചടിയായി രണ്ട് ഗ്രേഡ് എസ്ഐമാരുടെ മൊഴി. കേസ് അട്ടിമറിക്കാനും പ്രതികളായ ഗൺമാൻമാരെ രക്ഷിക്കാനും രേഖകളിൽ കൃത്രിമം കാണിക്കാൻ അജിത് കുമാർ ആവശ്യപ്പെട്ടതായി ഈ ഉദ്യോഗസ്ഥർ പ്രത്യേക അന്വേഷണ സംഘത്തിന് (SIT) മൊഴി നൽകി. ഇതോടെ കേസിൽ എഡിജിപിക്കെതിരെ അന്വേഷണം ശക്തമായിരിക്കുകയാണ്.

മുൻപ് എഡിജിപിയുടെ തിരുവനന്തപുരത്തെ ഓഫീസിൽ ഉണ്ടായിരുന്ന രണ്ട് ഗ്രേഡ് എസ്ഐമാരെ ആലപ്പുഴയിലേക്ക് വിളിച്ചുവരുത്തിയാണ് പ്രത്യേക അന്വേഷണ സംഘം ചോദ്യം ചെയ്തത്. മണിക്കൂറുകൾ നീണ്ട ചോദ്യം ചെയ്യലിൽ, യഥാർത്ഥ സാക്ഷിമൊഴികൾ, സിഡികൾ, ഡിജിറ്റൽ ഉപകരണങ്ങൾ എന്നിവയിൽ തിരുത്തലുകൾ വരുത്തിയതായി ഇവർ സമ്മതിച്ചു. ആക്രമണത്തിന്റെ ദൃശ്യങ്ങളും അന്നത്തെ അന്വേഷണ സംഘം രേഖപ്പെടുത്തിയ മൊഴികളും തമ്മിൽ വലിയ പൊരുത്തക്കേടുകൾ ഉള്ളതായി എസ്ഐടി നേരത്തെ കണ്ടെത്തിയിരുന്നു.

Also read

തൃഷയുടെ അമ്മയ്ക്ക് മുന്നിൽ വിജയിന്റെ ഭാര്യ സംഗീത ചെയ്തത്; പഴയ വീഡിയോ വീണ്ടും ചർച്ചകളിൽ അംബാനിയെയും ചൈനീസ് കോടീശ്വരന്മാരെയും മറികടന്ന് ഗൗതം അദാനി വീണ്ടും ഏഷ്യയിലെ ഏറ്റവും വലിയ പണക്കാരൻ

കീഴുദ്യോഗസ്ഥർ എഡിജിപിക്കെതിരെ നേരിട്ട് മൊഴി നൽകിയതോടെ അജിത് കുമാറിനെതിരെ കള്ളരേഖ ചമയ്ക്കൽ ഉൾപ്പെടെയുള്ള ജാമ്യമില്ലാ വകുപ്പുകൾ പ്രകാരം ക്രിമിനൽ കേസ് രജിസ്റ്റർ ചെയ്യാനും സസ്പെൻഷൻ ഉൾപ്പെടെയുള്ള അച്ചടക്ക നടപടികൾ ഉണ്ടാകാനും സാധ്യതയുണ്ട്. പ്രതികളായ പോലീസ് ഉദ്യോഗസ്ഥരുടെ ജാമ്യാപേക്ഷ പരിഗണിക്കുന്ന ശനിയാഴ്ച ഈ മൊഴികൾ കോടതിക്ക് കൈമാറും. ആഭ്യന്തര മന്ത്രി രമേഷ് ചെന്നിത്തലയുടെ നിർദ്ദേശങ്ങൾക്കായി കാത്തിരിക്കുകയാണ് അന്വേഷണ സംഘം ഇപ്പോൾ.