നവകേരള മർദ്ദനക്കേസ്: എഡിജിപി എം.ആർ അജിത് കുമാറിനെതിരെ ശക്തമായ നടപടിയുമായി രമേശ് ചെന്നിത്തല
നവകേരള യാത്രയ്ക്കിടെ യൂത്ത് കോൺഗ്രസ് പ്രവർത്തകർക്ക് നേരെയുണ്ടായ ക്രൂരമർദ്ദനവുമായി ബന്ധപ്പെട്ട കേസ് ഡയറി തിരുത്തുകയും നശിപ്പിക്കുകയും ചെയ്ത സംഭവത്തിൽ എഡിജിപി എം.ആർ അജിത് കുമാറിനെതിരെ ശക്തമായ നടപടിക്ക് നീക്കം. കേസിൽ എസ്ഐടി സമർപ്പിക്കുന്ന വിശദമായ റിപ്പോർട്ടിൽ എഡിജിപിയുടെ പേര് പരാമർശിച്ചാൽ ഉടൻ തന്നെ അദ്ദേഹത്തിനെതിരെ നടപടിയുണ്ടാകുമെന്ന് ആഭ്യന്തര മന്ത്രി രമേശ് ചെന്നിത്തല മുന്നറിയിപ്പ് നൽകി.
നവകേരള യാത്ര ആലപ്പുഴയിൽ എത്തിയപ്പോൾ മുൻ മുഖ്യമന്ത്രിയുടെ സുരക്ഷാ ഉദ്യോഗസ്ഥർ യൂത്ത് കോൺഗ്രസ് നേതാക്കളെ മർദ്ദിച്ച കേസിലെ പ്രഥമ വിവര റിപ്പോർട്ട് (എഫ്.ഐ.ആർ) തിരുത്താൻ എഡിജിപി നേരിട്ട് ഇടപെട്ടതായാണ് കണ്ടെത്തൽ. ആലപ്പുഴ ഡിവൈഎസ്പി അടക്കമുള്ള ഉദ്യോഗസ്ഥരെ തിരുവനന്തപുരത്തേക്ക് വിളിച്ചുവരുത്തി കേസ് ഡയറി തിരുത്തിക്കുകയും, യഥാർത്ഥ റിപ്പോർട്ട് കീറിക്കളയുകയും ചെയ്തതായി അന്വേഷണസംഘം കണ്ടെത്തിയിട്ടുണ്ട്.
കേസ് അന്വേഷിച്ച അഞ്ച് പോലീസ് ഉദ്യോഗസ്ഥർ എഡിജിപിക്കെതിരെ പ്രത്യേക അന്വേഷണ സംഘത്തിന് (എസ്ഐടി) മൊഴി നൽകിയിട്ടുണ്ട്. ആലപ്പുഴ സൗത്ത് സ്റ്റേഷൻ ഇൻസ്പെക്ടർ തയ്യാറാക്കിയ കേസ് ഡയറി തിരുത്തി ഗൺമാൻമാരെ കുറ്റവിമുക്തരാക്കാൻ എഡിജിപി സമ്മർദ്ദം ചെലുത്തിയെന്നാണ് മൊഴി. വരും ദിവസങ്ങളിൽ എസ്ഐടി സമർപ്പിക്കുന്ന അന്തിമ റിപ്പോർട്ടോടെ എഡിജിപി അജിത് കുമാറിനെതിരെ കർശന നടപടിയുണ്ടാകുമെന്നാണ് സൂചന.
