കേരളീയ വാസ്തുശാസ്ത്ര പ്രകാരം ഒരു വീടിന് എട്ട് വാസ്തുസ്ഥാനങ്ങൾ (അഷ്ടവാസ്തുസ്ഥാനങ്ങൾ) ഉണ്ട്. ഈ എട്ട് സ്ഥാനങ്ങൾ ശരിയായാൽ വീട്ടിലെ എല്ലാവർക്കും ജീവിതത്തിൽ ഉയർച്ചയും സമ്പൽസമൃദ്ധിയും ഐശ്വര്യവും ലഭിക്കും. എന്നാൽ ഇവ തെറ്റിയാൽ ദുഃഖവും ദുരിതവും കടവും രോഗവും മാത്രമായിരിക്കും ഫലം.

ഒന്നാമത്തെ ലക്ഷണം വീടിന്റെ പടികളുടെ എണ്ണമാണ്. പടികൾ എപ്പോഴും ഇരട്ട സംഖ്യയിൽ (2, 4, 6) ആയിരിക്കണം. ഒറ്റസംഖ്യയിൽ (1, 3, 5) പടി വന്നാൽ ആ വീട് കടം കയറി മുടിഞ്ഞ ചരിത്രമേ ഉണ്ടാകൂ. ആദ്യം ഒന്നാം പടിയിലും രണ്ടാം പടിയിലും കാല് വെച്ച് മൂന്നാമത്തെ കാല് വീടിന്റെ തറയിലാണ് വീഴുന്നതെങ്കിൽ അത് ശുഭം.

രണ്ടാമത്തേത് വീട്ടിലേക്കുള്ള വഴിയാണ്. വഴി വടക്കുകിഴക്കേ മൂലയിലൂടെയോ വടക്കുവശത്തൂടെയോ കിഴക്കുവശത്തൂടെയോ വരുന്നത് ഏറ്റവും നല്ലത്. പ്രധാന വാതിലിന് നേരെ വഴി വരാൻ പാടില്ല; അത് ഇടത്തോട്ടോ വലത്തോട്ടോ മാറ്റണം. കന്നിമൂലയിൽ (തെക്കുപടിഞ്ഞാറ്) വഴി വന്നാൽ നരകതുല്യമായ ജീവിതമായിരിക്കും.

മൂന്നാമത്തേത് ധനത്തിന്റെ സ്ഥാനമാണ്. അലമാരയോ ധനമോ വെക്കാൻ ഏറ്റവും ഉചിതമായ സ്ഥാനം തെക്കുപടിഞ്ഞാറേ മൂലയാണ് (കന്നിമൂല). അവിടെയുള്ള ബെഡ്റൂമിലാണ് അലമാര വെക്കേണ്ടത്. അലമാരയുടെ മുഖം വടക്കോട്ട് തിരിഞ്ഞിരിക്കണം; അപ്പോൾ വാതിൽ തുറക്കുമ്പോൾ വടക്ക് (ധനത്തിന്റെ ദിക്ക്) ദർശനമായി കിട്ടും.

നാലാമത്തേത് അടുപ്പിന്റെയും അടുക്കളയുടെയും സ്ഥാനമാണ്. പാചകം ചെയ്യുമ്പോൾ മുഖം കിഴക്കോട്ടോ വടക്കോട്ടോ ആയിരിക്കണം. അടുക്കള തെക്കുകിഴക്കേ മൂലയിലോ (അഗ്നികോൺ) വടക്കുകിഴക്കേ മൂലയിലോ ആയിരിക്കണം.

അഞ്ചാമത്തേത് ബാത്റൂമിന്റെ സ്ഥാനമാണ്. തെക്കുപടിഞ്ഞാറ്, വടക്കുകിഴക്ക്, തെക്കുകിഴക്ക് എന്നീ മൂന്ന് മൂലകളിലും ബാത്റൂം വരാൻ പാടില്ല. ഏറ്റവും നല്ല സ്ഥാനം വടക്കുപടിഞ്ഞാറേ മൂലയാണ്. കന്നിമൂലയിൽ ബാത്റൂം വന്നാൽ ആ വീട് മുടിഞ്ഞു.

ആറാമത്തേത് ജലത്തിന്റെ സ്ഥാനമാണ് (കിണർ, കുളം, വാട്ടർ ടാങ്ക്). ഏറ്റവും ഉചിതം വടക്കുകിഴക്കേ മൂലയാണ്. കിഴക്കുവശത്തും വടക്കുവശത്തും വരാം. എന്നാൽ തെക്കുവശത്തോ തെക്കുപടിഞ്ഞാറോ കിണർ വന്നാൽ സർവ്വനാശമാണ്.

ഏഴാമത്തേത് ബെഡ്റൂമിലെ കട്ടിലിന്റെ സ്ഥാനമാണ്. തല തെക്കോട്ടോ കിഴക്കോട്ടോ വെച്ച് കിടക്കണം. തെക്കോട്ട് തല വെച്ച് കിടന്ന് കിഴക്കോട്ട് മുഖം തിരിഞ്ഞ് എഴുന്നേൽക്കുന്നത് ഏറ്റവും നല്ലത്. അല്ലെങ്കിൽ കിഴക്കോട്ട് തല വെച്ച് കിടന്ന് വടക്കോട്ട് മുഖം തിരിഞ്ഞ് എഴുന്നേൽക്കാം.

എട്ടാമത്തേത് പ്രധാന വാതിൽ തുറന്ന് നേരെ കാണുന്ന കാഴ്ചയാണ്. അവിടെ പൊട്ടിയ ടൈലോ, വിറകുകൊള്ളികളോ, മുള്ളുചെടികളോ, ഉണങ്ങിയ മരങ്ങളോ ഉണ്ടാകരുത്. പകരം അവിടെ ഒരു തുളസിത്തറ ഉണ്ടെങ്കിൽ അത് സർവ്വ ഐശ്വര്യവും കൊണ്ടുവരും.

ഈ എട്ട് കാര്യങ്ങളും നിങ്ങളുടെ വീട്ടിൽ പരിശോധിക്കുക. എല്ലാം ശരിയായാൽ നിങ്ങളുടെ വീട് രാജയോഗ വാസ്തുവിൽ രക്ഷപ്പെട്ടിരിക്കുന്നു. എന്തെങ്കിലും ദോഷമുണ്ടെങ്കിൽ അത് മാറ്റി ഐശ്വര്യം നേടുക.