10 വർഷത്തെ ഇടവേളക്ക് ശേഷം കേരളത്തിൽ കോൺഗ്രസ് നേതൃത്വത്തിലുള്ള യുഡിഎഫ് സർക്കാർ അധികാരമേറ്റപ്പോൾ, മന്ത്രിസഭാ രൂപീകരണത്തിൽ ഏറ്റവും കൂടുതൽ ചർച്ച ചെയ്യപ്പെട്ട പേരായിരുന്നു പുതുപ്പള്ളിയിൽ നിന്നുള്ള യുവ എംഎൽഎ ചാണ്ടി ഉമ്മന്റേത്. എന്നാൽ അന്തിമ പട്ടികയിൽ അദ്ദേഹത്തിന്റെ പേര് ഉണ്ടായിരുന്നില്ല. ഇപ്പോൾ അദ്ദേഹം തുറന്നു പറയുന്നു.

മന്ത്രിസ്ഥാനത്തേക്ക് തുടക്കം മുതൽ തന്നെ തന്റെ പേര് പാർട്ടിതലത്തിൽ ഒരിടത്തും നിർദ്ദേശിക്കപ്പെട്ടിട്ടില്ല എന്ന് ചാണ്ടി ഉമ്മൻ വെളിപ്പെടുത്തി. മാധ്യമങ്ങൾ സ്വന്തം താല്പര്യപ്രകാരം ചമച്ചുണ്ടാക്കിയ ലിസ്റ്റ് ആയിരുന്നു അതെന്നും അദ്ദേഹം കുറ്റപ്പെടുത്തി. വാർത്തകൾ നൽകുമ്പോൾ മാധ്യമങ്ങൾ കൂടുതൽ ഉത്തരവാദിത്വം കാണിക്കണമെന്ന് അദ്ദേഹം ആവശ്യപ്പെട്ടു.

അധികാര രാഷ്ട്രീയത്തിന്റെ പദവികളെക്കാൾ ജനങ്ങൾ നൽകുന്ന സ്നേഹത്തിനാണ് താൻ മുൻഗണന നൽകുന്നതെന്ന് ചാണ്ടി ഉമ്മൻ വ്യക്തമാക്കി. “ജനങ്ങളുടെ ഹൃദയത്തിൽ സ്ഥാനം നേടാനാണ് ഞാൻ ആഗ്രഹിക്കുന്നത്. ജനങ്ങളോടൊപ്പം നിൽക്കാൻ തന്നെയാണ് എന്റെ അന്തിമ തീരുമാനം” അദ്ദേഹം പറഞ്ഞു.

പുതുപ്പള്ളിയുടെ വികസനത്തെക്കുറിച്ചുള്ള ആശങ്കകൾക്ക് മറുപടിയായി, മുഖ്യമന്ത്രി വിഡി സതീശൻ തന്നെയാണ് പുതുപ്പള്ളിയുടെ മന്ത്രിയെന്നും അദ്ദേഹത്തിന്റെ നേരിട്ടുള്ള മേൽനോട്ടത്തിൽ വികസനം വേഗത്തിലാകുമെന്നും അദ്ദേഹം പറഞ്ഞു.

എകെ ആന്റണിയുമായുള്ള കൂടിക്കാഴ്ച വ്യക്തിപരവും സ്നേഹനിർഭരവുമായിരുന്നുവെന്നും പ്രതിസന്ധിഘട്ടങ്ങളിൽ തനിക്ക് വഴിവിളക്കായി നിൽക്കുന്ന വ്യക്തിയാണ് ആന്റണിയെന്നും അദ്ദേഹം വിശദീകരിച്ചു.

ഉമ്മൻചാണ്ടി ഫൗണ്ടേഷന്റെ പ്രവർത്തനങ്ങൾ കേരളത്തിലെ 14 ജില്ലകളിലേക്കും വ്യാപിപ്പിക്കാൻ തീരുമാനിച്ചതായും അദ്ദേഹം അറിയിച്ചു. പാവപ്പെട്ടവർക്കുള്ള ചികിത്സ, വിദ്യാഭ്യാസം, പാർപ്പിടം തുടങ്ങിയ കാരുണ്യ പ്രവർത്തനങ്ങൾ തുടരുമെന്ന് അദ്ദേഹം ഉറപ്പു നൽകി.