സിഎംആർഎൽ മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റിന് (ഇഡി) അന്വേഷണവുമായി മുന്നോട്ടുപോകാമെന്ന് ഹൈക്കോടതി ഡിവിഷൻ ബെഞ്ച് വ്യക്തമാക്കി. അന്വേഷണം പൂർണമായും നിയമപരമാണെന്ന് നിരീക്ഷിച്ച കോടതി, ഹർജിക്കാരുടെ സ്റ്റേ ആവശ്യം തള്ളിയതോടെ മുഖ്യമന്ത്രി പിണറായി വിജയന്റെ മകൾ ടി. വീണയ്ക്കും സിഎംആർഎല്ലിനും കനത്ത തിരിച്ചടിയാണ് നേരിട്ടിരിക്കുന്നത്. കേസ് ഇനി ഒട്ടും വൈകിപ്പിക്കേണ്ടതില്ലെന്നും കോടതി അടിവരയിട്ടു പറഞ്ഞു.

ഹൈക്കോടതി വിധി വന്നതിന് തൊട്ടുപിന്നാലെ ഇഡി മേധാവി രാഹുൽ നവീൻ കൊച്ചിയിലെത്തി ഉന്നതതല യോഗം ചേർന്ന് തുടർനടപടികൾക്ക് രൂപം നൽകി കഴിഞ്ഞു. വീണയ്ക്കെതിരെ കടുത്ത നടപടികൾ പാടില്ലെന്ന കോടതിയുടെ താൽക്കാലിക സംരക്ഷണ കാലാവധി അവസാനിക്കുന്നതോടെ ഇഡി അന്വേഷണം ശക്തമാക്കുമെന്നാണ് സൂചന. ചോദ്യം ചെയ്യലിന് ഹാജരാകാൻ വിസമ്മതിച്ചാൽ വീണയെ കസ്റ്റഡിയിലെടുക്കുന്നത് അടക്കമുള്ള കടുത്ത നടപടികളിലേക്ക് ഏജൻസി കടന്നേക്കും.

Also read

തൃഷയുടെ അമ്മയ്ക്ക് മുന്നിൽ വിജയിന്റെ ഭാര്യ സംഗീത ചെയ്തത്; പഴയ വീഡിയോ വീണ്ടും ചർച്ചകളിൽ അംബാനിയെയും ചൈനീസ് കോടീശ്വരന്മാരെയും മറികടന്ന് ഗൗതം അദാനി വീണ്ടും ഏഷ്യയിലെ ഏറ്റവും വലിയ പണക്കാരൻ

കഴിഞ്ഞ ദിവസങ്ങളിൽ കേരളത്തിൽ ഉടനീളം ഇഡി നടത്തിയ റെയ്ഡുകളിൽ നിർണായക വിവരങ്ങൾ ലഭിച്ചതായാണ് റിപ്പോർട്ടുകൾ. കേന്ദ്ര ഏജൻസികളെ ഉപയോഗിച്ച് രാഷ്ട്രീയ വേട്ടയാടൽ നടത്തുകയാണെന്ന് ആരോപിച്ച് സിപിഎം പ്രതിരോധം ശക്തമാക്കുമ്പോൾ വരും മണിക്കൂറുകളിൽ രാഷ്ട്രീയ കേരളം ഉറ്റുനോക്കുന്നത് ഇഡിയുടെ അടുത്ത നീക്കങ്ങളിലേക്കാണ്. അറസ്റ്റ് നടപടികളിലേക്ക് ഇഡി നീങ്ങുമോ അതോ എക്സാലോജിക് സുപ്രീം കോടതിയെ സമീപിക്കുമോ എന്നാണ് ഇനി അറിയേണ്ടത്.