കൊച്ചുപ്രേമൻ എന്ന് വിളിച്ച് പരിഹസിക്കുന്നവരോട്; ട്രോളുകൾക്കെതിരെ പ്രതികരിച്ച് ജാൻമണി ദാസ്
തനിക്കെതിരെ സോഷ്യൽ മീഡിയയിൽ ഉയരുന്ന ട്രോളുകളോട് പ്രതികരിച്ച് പ്രശസ്ത സെലിബ്രിറ്റി മേക്കപ്പ് ആർട്ടിസ്റ്റും ബിഗ് ബോസ് താരവുമായ ജാൻമണി ദാസ് രംഗത്ത്. അവതാരകയും തന്റെ അടുത്ത സുഹൃത്തുമായ രഞ്ജിനി ഹരിദാസിന്റെ യൂട്യൂബ് ചാനലിന് നൽകിയ അഭിമുഖത്തിലാണ് ജാൻമണി തന്നെ പരിഹസിക്കുന്നവർക്കെതിരെയും അന്തരിച്ച നടൻ കൊച്ചുപ്രേമന്റെ പേര് വലിച്ച് ഇഴയ്ക്കുന്നവർക്കെതിരെയും മനസ്സ് തുറന്നത്.
ട്രോളുകൾ താൻ ആസ്വദിക്കാറുണ്ടെങ്കിലും അന്തരിച്ച നടൻ കൊച്ചുപ്രേമന്റെ പേര് പറഞ്ഞ് തന്നെ പരിഹസിക്കുന്നത് അദ്ദേഹത്തോടുള്ള അനാദരവാണെന്ന് ജാൻമണി പറഞ്ഞു. ഒരു വലിയ കലാകാരനെ അപമാനിക്കുന്ന രീതിയിലുള്ള ട്രോളുകൾ കാണുമ്പോൾ വിഷമം തോന്നാറുണ്ടെന്നും, അദ്ദേഹത്തിന്റെ കുടുംബത്തെക്കുറിച്ച് ഇത്തരം പരിഹാസകർ ചിന്തിക്കാത്തത് കഷ്ടമാണെന്നും ജാൻമണി കൂട്ടിച്ചേർത്തു.
ബിഗ് ബോസ് ഷോയിലെ തന്റെ പ്രശസ്തമായ ശാപങ്ങളെക്കുറിച്ചും ജാൻമണി പ്രതികരിച്ചു. കൊടുങ്ങല്ലൂർ അമ്മ തന്റെ മമ്മിയെപ്പോലെയാണെന്നും ഇനിയും ശാപം നൽകുമെന്നും താരം തമാശയോടെ പറഞ്ഞു. കൂടാതെ, കേരളം വിട്ട് ബാംഗ്ലൂരിലേക്ക് പോകാൻ പറയുന്നവരോട് താൻ ബാംഗ്ലൂർകാരിയല്ലെന്നും അസം സ്വദേശിയാണെന്നും വ്യക്തമാക്കിയ ജാൻമണി, കേരളം വിട്ട് എങ്ങോട്ടും പോകില്ലെന്നും ഉറപ്പിച്ചു പറഞ്ഞു.
