കേരളത്തിന്റെ സാമ്പത്തിക സ്ഥിതി വ്യക്തമാക്കുന്ന ധവളപത്രം നിയമസഭയിൽ സമർപ്പിച്ചു
കേരളത്തിന്റെ യഥാർത്ഥ സാമ്പത്തിക സ്ഥിതി പൊതുജനങ്ങളും ജനപ്രതിനിധികളും ഉദ്യോഗസ്ഥരും മനസ്സിലാക്കുന്നതിനായി സംസ്ഥാന സർക്കാരിന്റെ ധവളപത്രം നിയമസഭയുടെ മേശപ്പുറത്ത് വെച്ചു. ധനകാര്യ വകുപ്പിന്റെ നേതൃത്വത്തിൽ തയ്യാറാക്കി, മന്ത്രിസഭയുടെ പൂർണ്ണ അംഗീകാരത്തോടെയാണ് ‘കേരള ഫിസ്ക്കൽ ഹെൽത്ത്’ എന്ന പേരിലുള്ള ഈ സ്റ്റാറ്റസ് റിപ്പോർട്ട് സഭയിൽ സമർപ്പിച്ചത്. ഭാവി കേരളം കെട്ടിപ്പടുക്കുന്നതിനുള്ള അടിസ്ഥാന രേഖയായി ഇത് മാറുമെന്നാണ് സർക്കാർ വ്യക്തമാക്കുന്നത്.
പൂർണ്ണമായും പബ്ലിക് ഡൊമൈനിലുള്ള വിവരങ്ങൾ വിശകലനം ചെയ്ത് തയ്യാറാക്കിയ ഈ രേഖയിൽ യാതൊരുവിധ രഹസ്യ വിവരങ്ങളും അടങ്ങിയിട്ടില്ലെന്ന് സർക്കാർ വ്യക്തമാക്കി. മുൻ കാബിനറ്റ് സെക്രട്ടറിയും പ്ലാനിംഗ് ബോർഡ് ഉപാധ്യക്ഷനുമായിരുന്ന കെ.എം. ചന്ദ്രശേഖർ, സാമ്പത്തിക വിദഗ്ദ്ധൻ ഡോ. ഡി. നാരായണ, സി.ഡി.എസ് ചെയർമാൻ ഡോ. വീരമണി എന്നിവരടങ്ങുന്ന വിദഗ്ദ്ധരുടെ സഹായത്തോടെയാണ് ധനകാര്യ വകുപ്പ് ഈ റിപ്പോർട്ട് തയ്യാറാക്കിയത്. ഇത് രാഷ്ട്രീയ ലക്ഷ്യങ്ങളോടെയുള്ള രേഖയല്ലെന്നും, സംസ്ഥാനത്തിന്റെ സാമ്പത്തിക ആരോഗ്യത്തെക്കുറിച്ചുള്ള യഥാർത്ഥ ചിത്രമാണെന്നും സഭയിൽ വ്യക്തമാക്കിയിട്ടുണ്ട്.
