കേരള രാഷ്ട്രീയത്തെയും പോലീസ് സേനയെയും ഒരുപോലെ ഉലച്ചുകളഞ്ഞ ഒരു വൻ അട്ടിമറിയുടെ കഥയാണ് ഇപ്പോൾ പുറത്തുവരുന്നത്. അധികാരത്തിന്റെ തണലിൽ എന്തും ചെയ്യാമെന്നും നിയമത്തെയും ജനങ്ങളെയും ഒരുപോലെ വിഡ്ഢികളാക്കാം എന്നും കരുതിയ ചില ഉന്നത പോലീസ് ഉദ്യോഗസ്ഥരുടെ കണക്കുകൂട്ടലുകളാണ് ഇപ്പോൾ പാടെ തെറ്റിയിരിക്കുന്നത്.

നവകേരള യാത്രയ്ക്കിടെ യൂത്ത് കോൺഗ്രസ് പ്രവർത്തകർക്ക് നേരെ മുഖ്യമന്ത്രിയുടെ ഗൺമാൻ നടത്തിയ ക്രൂരമായ ആക്രമണമായിരുന്നു സംഭവത്തിന്റെ തുടക്കം. പോലീസിന്റെ കൺമുന്നിൽ വെച്ച് പോലീസിനാൽ നിയന്ത്രിക്കപ്പെട്ട ചെറുപ്പക്കാരെ ക്രൂരമായി തല്ലിച്ചതച്ച ആ സംഭവം നിയമവാഴ്ചയുടെ വെല്ലുവിളി കൂടിയായിരുന്നു.

എന്നാൽ അതിനേക്കാൾ വലിയ വെല്ലുവിളിയാണ് അതിനുശേഷം പോലീസ് ആസ്ഥാനത്ത് നടന്നത്. ആ അക്രമത്തെയും നിയമലംഘനത്തെയും വെള്ളപൂശാൻ കേസ് അട്ടിമറിക്കാൻ പോലീസ് സേനയിലെ ഏറ്റവും ഉന്നതനായ എഡിജിപി എം ആർ അജിത് കുമാർ നേരിട്ട് രംഗത്തിറങ്ങി. പ്രത്യേക അന്വേഷണ സംഘമാണ് ഞെട്ടിക്കുന്ന ഈ വിവരങ്ങൾ പുറത്തുവിട്ടത്.

ആലപ്പുഴ ഡിവൈഎസ്പിയെ എഡിജിപി അജിത് കുമാർ തന്റെ ഓഫീസിലേക്ക് രഹസ്യമായി മൂന്നോളം തവണ വിളിപ്പിച്ചു. കേസ് ഡയറി നേരിട്ട് വിളിച്ചു തിരുത്താനായിരുന്നു ഈ രഹസ്യകൂടികാഴ്ചകൾ. ഗൺമാന്മാർ നടത്തിയ ക്രൂരമായ ചട്ടലംഘനം ക്രിമിനൽ കുറ്റമാണ് എന്ന് വ്യക്തമാക്കുന്ന അന്വേഷണ റിപ്പോർട്ട് എങ്ങനെയെങ്കിലും തിരുത്തുക എന്നതായിരുന്നു ലക്ഷ്യം.

അക്രമം നടത്തിയ മുൻ മുഖ്യമന്ത്രിയുടെ സുരക്ഷാ ജീവനക്കാരെ സംരക്ഷിക്കാൻ വേണ്ടിയായിരുന്നു ഈ നീക്കം. എന്നാൽ എത്രയൊക്കെ മൂടിവെക്കാൻ ശ്രമിച്ചാലും സത്യം ഒരുനാൾ പുറത്തുവരുമെന്ന് ഈ സംഭവം തെളിയിക്കുന്നു. മുൻ മുഖ്യമന്ത്രിയുടെ ഗൺമാന്മാർ ഉൾപ്പെടെയുള്ള നാല് പോലീസ് ഉദ്യോഗസ്ഥർ ഗുരുതരമായ ചട്ടലംഘനം നടത്തിയെന്ന് അന്വേഷണ സംഘം കണ്ടെത്തി.

മുൻപ് ആലപ്പുഴ എസ്ബി സമർപ്പിച്ച കടുത്ത റിപ്പോർട്ട് പോലും അന്നത്തെ അഭ്യന്തര വകുപ്പ് പൂർണമായും മുക്കുകയായിരുന്നു. വിഡി സതീശന്റെ ശക്തമായ ഇടപെടലുകളും ചോദ്യങ്ങളുമാണ് ഇപ്പോൾ പോലീസ് മേധാവികളുടെ തൊപ്പി തെറിപ്പിക്കുന്ന അവസ്ഥയിലേക്ക് കാര്യങ്ങളെ എത്തിച്ചത്.