കേരളത്തിൽ പാമ്പ് കടിയേറ്റ് രണ്ട് പെൺകുട്ടികൾക്ക് ദാരുണാന്ത്യം; ജാഗ്രതാ നിർദ്ദേശങ്ങൾ ഇങ്ങനെ
കേരളത്തിൽ പാമ്പ് കടിയേറ്റ് ചികിത്സയിലായിരുന്ന രണ്ട് 13 വയസ്സുകാരികൾക്ക് ദാരുണാന്ത്യം. അരൂർ സ്വദേശിനിയായ നിയാ ലെനിൻ, പാലക്കാട് നെന്മാറ സ്വദേശിനിയായ രാജേശ്വരി എന്നിവരാണ് കഴിഞ്ഞ ദിവസങ്ങളിൽ മരണത്തിന് കീഴടങ്ങിയത്. കാലവർഷം ആരംഭിക്കുന്ന ഈ സാഹചര്യത്തിൽ പാമ്പുകടിക്കെതിരെ അതീവ ജാഗ്രത പാലിക്കേണ്ടതിന്റെ ആവശ്യകതയിലേക്കാണ് ഈ ദാരുണ സംഭവങ്ങൾ വിരൽ ചൂണ്ടുന്നത്.
അരൂർ സെന്റ് അഗസ്റ്റീൻ സ്കൂളിലെ എട്ടാം ക്ലാസ് വിദ്യാർത്ഥിനിയായ നിയയ്ക്ക് മെയ് ഏഴിനാണ് പാമ്പ് കടിയേറ്റത്. നൃത്ത പരിശീലനത്തിന് പോകുന്നതിനിടെയുണ്ടായ പാമ്പ് കടി ഉറുമ്പ് കടിച്ചതാണെന്ന് കരുതി അവഗണിച്ച കുട്ടി, വീട്ടിലെത്തി ഒരു മണിക്കൂറിന് ശേഷം കുഴഞ്ഞുവീഴുകയായിരുന്നു. 24 ദിവസത്തെ തീവ്രപരിചരണ വിഭാഗത്തിലെ ചികിത്സയ്ക്ക് ശേഷമാണ് നിയ മരണപ്പെട്ടത്. പാലക്കാട് വീടിനുള്ളിൽ കളിച്ചുകൊണ്ടിരിക്കെയാണ് ഏഴാം ക്ലാസുകാരിയായ രാജേശ്വരിയെ മൂർഖൻ പാമ്പ് കടിച്ചത്. രണ്ടാഴ്ചയോളം തൃശൂർ മെഡിക്കൽ കോളേജിൽ ചികിത്സയിലായിരുന്ന രാജേശ്വരിയും കഴിഞ്ഞ ദിവസം മരണത്തിന് കീഴടങ്ങി.
മഴക്കാലത്ത് പാമ്പുകളുടെ ശല്യം വർദ്ധിക്കാൻ സാധ്യതയുള്ളതിനാൽ വീടും പരിസരവും എപ്പോഴും വൃത്തിയായി സൂക്ഷിക്കണമെന്ന് വിദഗ്ദ്ധർ മുന്നറിയിപ്പ് നൽകുന്നു. പാദരക്ഷകൾ ധരിക്കുന്നതിന് മുൻപും വാഹനങ്ങൾ എടുക്കുന്നതിന് മുൻപും പരിശോധിക്കേണ്ടത് അത്യാവശ്യമാണ്. പാമ്പ് കടിയേറ്റാൽ പരിഭ്രാന്തരാകാതെ എത്രയും വേഗം വിദഗ്ദ്ധ ചികിത്സ തേടണം. മുറിവേറ്റ ഭാഗം ഹൃദയത്തിന്റെ ഭാഗത്തേക്കാൾ താഴ്ത്തി വെക്കാനും, അമിതമായി മുറുക്കി കെട്ടുന്നത് ഒഴിവാക്കാനും ശ്രദ്ധിക്കണം. രാത്രികാലങ്ങളിൽ സഞ്ചരിക്കുമ്പോൾ മൊബൈൽ ഫ്ലാഷിന് പകരം വ്യക്തമായ വെളിച്ചം തരുന്ന ടോർച്ചുകൾ ഉപയോഗിക്കണമെന്നും നിർദ്ദേശമുണ്ട്.
