കൊല്ലം കടക്കൽ അഞ്ചുമുക്കിൽ പ്രവാസി ദമ്പതികളെ വീടിനുള്ളിൽ മരിച്ച നിലയിൽ കണ്ടെത്തിയത് വലിയ ദുരൂഹതയ്ക്ക് വഴിവെച്ചിരിക്കുകയാണ്. വിദേശത്തേക്ക് തിരികെ പോകാനിരിക്കെയാണ് ദുരന്തം സംഭവിച്ചത്.

കടക്കൽ അഞ്ചുമുക്ക് സ്വദേശികളായ സുഗതൻ ഭാര്യ ലത എന്നിവരാണ് മരണപ്പെട്ടത്. വർഷങ്ങളോളം വിദേശത്ത് ജോലി ചെയ്തിരുന്ന ഇരുവരും നാട്ടിൽ വളരെ പ്രിയപ്പെട്ടവരായിരുന്നു. പാവപ്പെട്ടവർക്കും ആരുമില്ലാത്തവർക്കും സാമ്പത്തികമായി ബുദ്ധിമുട്ടുന്നവർക്കും ഒരു കൈത്താങ്ങായി നിന്നിരുന്ന പ്രവാസി ദമ്പതികളായിരുന്നു അവർ.

രണ്ടു മക്കളുടെ മാതാപിതാക്കളായ ഇവർ സാമ്പത്തികമായി ഒരു പ്രശ്നവുമില്ലാതെ സന്തോഷത്തോടെ കഴിയുന്നവരായിരുന്നു. കുറച്ചു ദിവസങ്ങൾക്ക് മുമ്പ് അവധിക്ക് നാട്ടിൽ എത്തിയ ഇവർ തിരികെ പോകാനുള്ള എല്ലാ കാര്യങ്ങളും പ്ലാൻ ചെയ്ത ശേഷമാണ് അന്ന് രാത്രി കിടന്നുറങ്ങിയത്.

എന്നാൽ പിറ്റേന്ന് വിദേശത്തേക്ക് പോകാനിരിക്കെ അവരെ വിളിക്കാൻ എത്തിയ യുവാവാണ് ഇരുവരെയും കിടപ്പുമുറിയിൽ മരിച്ച നിലയിൽ കണ്ടെത്തിയത്. ഈ ഒറ്റ രാത്രികൊണ്ട് ജീവിതം അവസാനിപ്പിക്കണമെന്ന് കരുതാൻ അവർക്കിടയിൽ ഒരു പ്രശ്നവും ഉണ്ടായിട്ടില്ലെന്നാണ് നാട്ടുകാർ പറയുന്നത്.

ആത്മഹത്യ കുറിപ്പ് പോലും ഇവർ എഴുതിവെച്ചിട്ടില്ല എന്നതാണ് പ്രധാന സംശയത്തിന് കാരണം. സാമ്പത്തിക ബുദ്ധിമുട്ടുകളോ കുടുംബ പ്രശ്നങ്ങളോ വ്യക്തി വൈരാഗ്യമോ ഒന്നും ഇല്ലാത്തതിനാൽ ഇത് കൊലപാതകമാകാനുള്ള സാധ്യതയിലേക്കാണ് പോലീസ് അന്വേഷണം നീങ്ങുന്നത്.

പോലീസ് സിസിടിവി ദൃശ്യങ്ങളും ഫോൺ രേഖകളും പരിശോധിച്ച് വരികയാണ്. മൃതദേഹങ്ങൾ പോസ്റ്റ്മാർട്ടത്തിനായി ആശുപത്രിയിലേക്ക് മാറ്റിയിരിക്കുകയാണ്. ഫോറൻസിക് വിദഗ്ധരുടെ സഹായവും തേടിയേക്കും.

ഈ സംഭവം പുലിയൂരിലെ യേശുദാസിന്റെ ദുരൂഹ മരണത്തെ ഓർമ്മിപ്പിക്കുന്നതാണ്. ഹോം നഴ്സ് നൽകിയ കേക്ക് കഴിച്ചതിനെ തുടർന്ന് യേശുദാസ് മരണപ്പെട്ട കേസിൽ സ്വത്തിനായി ആസൂത്രിതമായ കൊലപാതകമാണ് നടന്നതെന്ന് പിന്നീട് വ്യക്തമായിരുന്നു.

കൊല്ലത്തെ ഈ മരണത്തിലും സമാനമായ എന്തെങ്കിലും ഗൂഢാലോചനയുണ്ടോ എന്ന കോണിൽ കൂടി പോലീസ് അന്വേഷണം നടത്തുന്നുണ്ട്. മക്കൾ ഉടൻ നാട്ടിലേക്ക് തിരികെ വരാനുള്ള സാധ്യതയുണ്ട്.