ട്രെയിനിൽ നിന്ന് ടിടിഇ തള്ളിയിട്ട മുൻ സ്റ്റേഷൻ മാസ്റ്റർ കാരുണ്യത്തിന്റെ പുതിയ പാഠം പഠിപ്പിച്ചു
ദീപാവലി തിരക്കിനിടയിൽ ട്രെയിനിൽ കയറിയതിന് റെയിൽവേ ടിടിഇ ക്രൂരമായി മർദ്ദിച്ച് പ്ലാറ്റ്ഫോമിലേക്ക് തള്ളിയിട്ട വൃദ്ധൻ റെയിൽവേയിലെ മുൻ ഉന്നത ഉദ്യോഗസ്ഥനാണെന്ന് തിരിച്ചറിഞ്ഞതോടെ ടിടിഇ പിടിയിലായി. സ്ലീപ്പർ കോച്ചിലെ അനിയന്ത്രിതമായ തിരക്കുകാരണം എസി കോച്ചിൽ അഭയം തേടിയ 65-കാരനായ മുൻ സ്റ്റേഷൻ മാസ്റ്റർ ശിവനാരായൺ പ്രസാദിനെയാണ് വിനയ് എന്ന ടിടിഇ പ്രയാഗ്രാജ് സ്റ്റേഷനിൽ വെച്ച് ട്രെയിനിൽ നിന്ന് തള്ളിപ്പുറത്താക്കിയത്. റെയിൽവേയിൽ 35 വർഷത്തെ സേവന പരിചയമുള്ള ശിവനാരായൺ പ്രസാദിന്റെ കയ്യിൽ കൺഫോംഡ് സ്ലീപ്പർ ടിക്കറ്റ് ഉണ്ടായിരുന്നിട്ടും ടിടിഇ അദ്ദേഹത്തെ ക്രൂരമായി അപമാനിക്കുകയായിരുന്നു.
വീഴ്ചയിൽ പരിക്കേറ്റ ശിവനാരായൺ പ്രസാദ് ഉടൻ തന്നെ റെയിൽവേ കൺട്രോൾ റൂമിൽ വിളിച്ച് വിവരം അറിയിച്ചു. ചപ്ര ജംഗ്ഷനിലെ മുൻ സ്റ്റേഷൻ മാസ്റ്ററായ ഇദ്ദേഹത്തിന്റെ വിവരം അറിഞ്ഞതോടെ ആർപിഎഫ് ഉദ്യോഗസ്ഥരും റെയിൽവേ അധികൃതരും പ്ലാറ്റ്ഫോമിലേക്ക് ഓടിയെത്തി. ശിവനാരായൺ പ്രസാദിന്റെ കീഴിൽ മുൻപ് പരിശീലനം നേടിയിട്ടുള്ള ഡിആർഎം അശോക് കുമാർ വിവരം അറിഞ്ഞതോടെ കടുത്ത നടപടിക്ക് ഉത്തരവിടുകയും അടുത്ത സ്റ്റേഷനായ ഫഫാമൗവിൽ വെച്ച് ടിടിഇയെ ആർപിഎഫ് കസ്റ്റഡിയിൽ എടുക്കുകയും ചെയ്തു. യാത്രക്കാർ പകർത്തിയ മർദ്ദന ദൃശ്യങ്ങൾ റെയിൽവേ ഉന്നതതലങ്ങളിലും സോഷ്യൽ മീഡിയയിലും ഇതിനോടകം പ്രചരിച്ചിരുന്നു.
ജോലി നഷ്ടപ്പെടുമെന്ന അവസ്ഥയിൽ മെഡിക്കൽ റൂമിൽ വെച്ച് ശിവനാരായൺ പ്രസാദിന്റെ കാലുപിടിച്ച് മാപ്പപേക്ഷിച്ച ടിടിഇയോട് അദ്ദേഹം കാണിച്ച കാരുണ്യം റെയിൽവേ ഉദ്യോഗസ്ഥരെപ്പോലും അത്ഭുതപ്പെടുത്തി. അയാളെ ജോലിയിൽ നിന്ന് പിരിച്ചുവിടരുതെന്നും പകരം സസ്പെൻഡ് ചെയ്ത് മനുഷ്യത്വത്തോടെ പെരുമാറാൻ പഠിപ്പിക്കുന്ന പ്രത്യേക പരിശീലനത്തിന് അയക്കണമെന്നും അദ്ദേഹം ആവശ്യപ്പെട്ടു. തെറ്റുതിരുത്താൻ ടിടിഇക്ക് അവസരം നൽകിയ അദ്ദേഹം റെയിൽവേ ഒരുക്കിയ പ്രത്യേക ആഡംബര സൗകര്യങ്ങൾ നിരസിച്ച് സാധാരണ കമ്പാർട്ട്മെന്റിൽ യാത്ര ചെയ്ത് തന്റെ കുടുംബത്തോടൊപ്പം ദീപാവലി ആഘോഷിക്കാൻ നാട്ടിലെത്തി.
