റോഡ് ഉപരോധ വിവാദം: കോർപ്പറേഷന് പങ്കില്ലെന്ന് വ്യക്തമാക്കി മേയർ
കോർപ്പറേഷന്റെ ഔദ്യോഗിക പരിപാടിക്കായി റോഡ് കെട്ടിയടച്ചു എന്ന രീതിയിൽ പ്രചരിക്കുന്ന മാധ്യമ വാർത്തകൾ പൂർണ്ണമായും തള്ളി തിരുവനന്തപുരം മേയർ. തകരപ്പറമ്പിൽ നടന്ന പ്രസ്തുത പരിപാടി നഗരസഭയുടെ ഔദ്യോഗിക പരിപാടിയല്ലെന്നും, ഇതുമായി ബന്ധപ്പെട്ട് യാതൊരുവിധ ചർച്ചകളോ ഫണ്ട് അനുവദിക്കലോ കോർപ്പറേഷൻ നടത്തിയിട്ടില്ലെന്നും മേയർ വ്യക്തമാക്കി.
പി.ഡബ്ല്യു.ഡി (PWD) റോഡിൽ നടക്കുന്ന ഇത്തരം കാര്യങ്ങളിൽ ഇടപെടാൻ മുൻസിപ്പൽ ആക്ട് പ്രകാരം മേയർക്കോ കോർപ്പറേഷനോ നിയമപരമായ അധികാരമില്ലെന്ന് മേയർ ചൂണ്ടിക്കാട്ടി. ഇത്തരം റോഡുകളിലെ തടസ്സങ്ങൾ പരിശോധിക്കേണ്ടതും നടപടിയെടുക്കേണ്ടതും പോലീസും പൊതുമരാമത്ത് വകുപ്പുമാണ്. മാനവീയം വീഥി, പൂജപ്പുര മൈതാനം, ഗാന്ധി പാർക്ക്, പുത്തരിക്കണ്ടം മൈതാനം തുടങ്ങിയ നഗരസഭയുടെ പരിധിയിലുള്ള സ്ഥലങ്ങളിൽ മാത്രമേ കോർപ്പറേഷന് അനുമതി നൽകാൻ അധികാരമുള്ളൂവെന്നും, അവിടെപ്പോലും ഗതാഗത തടസ്സം ഉണ്ടാക്കരുതെന്ന് കർശന നിർദ്ദേശമുണ്ട് എന്നും മേയർ കൂട്ടിച്ചേർത്തു.
പരിപാടിയുടെ സംഘാടകർ നോട്ടീസുകളിലും ബോർഡുകളിലും തന്റെ ചിത്രവും പേരും വെച്ചതുകൊണ്ട് മാത്രം അത് കോർപ്പറേഷൻ പരിപാടിയാകില്ലെന്ന് മേയർ വ്യക്തമാക്കി. പൊതുപ്രവർത്തകർ എന്ന നിലയിൽ പല സംഘടനകളും തങ്ങളുടെ അനുമതിയില്ലാതെ തന്നെ ചിത്രങ്ങൾ ഉപയോഗിക്കാറുണ്ട്. പരിസ്ഥിതി ദിനവുമായി ബന്ധപ്പെട്ട് രണ്ട് പരിപാടികളിൽ മാത്രമാണ് താൻ പങ്കെടുക്കാൻ തീരുമാനിച്ചിരുന്നതെന്നും വസ്തുതകൾ അന്വേഷിക്കാതെയും മുൻസിപ്പൽ നിയമങ്ങളെക്കുറിച്ച് ധാരണയില്ലാതെയും വാർത്തകൾ നൽകുന്ന മാധ്യമ ശൈലി തിരുത്തണമെന്നും മേയർ ആവശ്യപ്പെട്ടു.
