തമിഴ്നാട്ടിൽ മൂന്ന് എംഎൽഎമാർ രാജിവെച്ചു; പ്രതിപക്ഷ ശക്തി കുറഞ്ഞു
തമിഴ്നാട്ടിൽ പ്രതിപക്ഷ പാർട്ടിയായ അണ്ണാ ഡിഎംകെ (പളനിസ്വാമി വിഭാഗത്തിൽ നിന്ന്) മൂന്ന് എംഎൽഎമാർ രാജിവെച്ച് ഭരണകക്ഷിയായ ടിവികെയിൽ ചേർന്നു. ഇതോടെ സഭയിലെ പ്രതിപക്ഷ ശക്തി കുറയുകയും തമിഴ്നാട് രാഷ്ട്രീയത്തിൽ വലിയ മാറ്റത്തിന് വഴിയൊരുങ്ങുകയും ചെയ്തു.
രാജിവെച്ച മൂന്ന് എംഎൽഎമാർ ഈറോഡ് ജില്ലയിലെ പെരുന്തുരൈ എംഎൽഎ എസ്. ജയകുമാർ, ചെങ്കൽപേട്ട് ജില്ലയിലെ മധുരാന്തകം എംഎൽഎ മരകതം കുമാരവേൽ, തിരുപ്പൂർ ജില്ലയിലെ ധാരാപുരം എംഎൽഎ പി. സത്യഭാമ എന്നിവരാണ്. രാജിവെച്ച ശേഷം ഇവർ ടിവികെ നേതാവും മന്ത്രിയുമായ ആദവ് അർജുനയെ സന്ദർശിച്ച് പാർട്ടിയിൽ ചേരുന്നതായി അറിയിച്ചു. ഇതോടെ അണ്ണാ ഡിഎംകെയുടെ അംഗസംഖ്യ 44 ആയി കുറഞ്ഞു. വിമതപക്ഷത്ത് 17 ഉം ഇപിഎസ് പക്ഷത്ത് 27 ഉം എംഎൽഎമാരുണ്ട്. ഒഴിവുവന്ന മൂന്ന് മണ്ഡലങ്ങളിലും തിരുച്ചിറപ്പള്ളി ഈസ്റ്റിലും ഉപതെരഞ്ഞെടുപ്പ് നടക്കും. ടിവികെ കൂടുതൽ എംഎൽഎമാരെ ആകർഷിക്കാൻ ശ്രമിക്കുന്നുണ്ടെങ്കിലും പണമോ പദവിയോ വാഗ്ദാനം ചെയ്തിട്ടില്ലെന്ന് നേതാക്കൾ പറയുന്നു. തമിഴ്നാട്ടിൽ വിജയ് തരംഗത്തിന്റെ ഭാഗമായാണ് ഈ മാറ്റങ്ങളെന്നും വിലയിരുത്തപ്പെടുന്നു.
