വടകര കാഫിർ സ്ക്രീൻഷോട്ട് വിവാദം: സർക്കാർ പുനരന്വേഷണത്തിന് ഉത്തരവിട്ടു
കഴിഞ്ഞ ലോക്സഭാ തെരഞ്ഞെടുപ്പ് കാലത്ത് വടകരയിൽ വലിയ രാഷ്ട്രീയ വിവാദമായി മാറിയ ‘കാഫിർ’ സ്ക്രീൻഷോട്ട് കേസിൽ സർക്കാർ പുനരന്വേഷണത്തിന് ഉത്തരവിട്ടു. കോഴിക്കോട് റൂറൽ ഡിവൈഎസ്പി മനോഹരൻ ടിയുടെ നേതൃത്വത്തിലുള്ള ഏഴംഗ പ്രത്യേക അന്വേഷണ സംഘമാണ് കേസ് അന്വേഷിക്കുന്നത്. കണ്ണൂർ ഡിഐജി ഈ അന്വേഷണം ഏകോപിപ്പിക്കും.
വടകരയിൽ കെ.കെ. ശൈലജയും ഷാഫി പറമ്പിലും തമ്മിൽ ശക്തമായ മത്സരം നടന്ന സമയത്താണ് ഈ വിവാദ സ്ക്രീൻഷോട്ട് പ്രചരിച്ചത്. എംഎസ്എഫ് നേതാവ് പി.കെ. മുഹമ്മദ് കാസിം ആണ് ഇത് പോസ്റ്റ് ചെയ്തതെന്ന ആരോപണവുമായി എൽഡിഎഫ് രംഗത്തുവന്നിരുന്നു. എന്നാൽ തന്റെ പേരിൽ വ്യാജമായി നിർമ്മിച്ചതാണ് ഇതെന്ന് കാസിം വ്യക്തമാക്കുകയും കോടതിയെ സമീപിക്കുകയും ചെയ്തു. തുടർന്ന് നടത്തിയ അന്വേഷണത്തിൽ ‘പോരാളി ഷാജി’, ‘റെഡ് ബറ്റാലിയൻ’ തുടങ്ങിയ ഇടത് അനുകൂല പേജുകളിലാണ് ഇത് വ്യാപകമായി പ്രചരിപ്പിക്കപ്പെട്ടതെന്നും ഒടുവിൽ അന്വേഷണം ഡിവൈഎഫ്ഐ നേതാവിലേക്ക് എത്തിയതായും കണ്ടെത്തിയെങ്കിലും ഉറവിടം കണ്ടെത്താനാകാതെ മുൻ അന്വേഷണം അവസാനിപ്പിക്കുകയായിരുന്നു.
കുറ്റ്യാടി എംഎൽഎ പാറക്കൽ അബ്ദുള്ള നൽകിയ പരാതിയുടെ അടിസ്ഥാനത്തിലാണ് ഇപ്പോൾ പുനരന്വേഷണത്തിന് ഉത്തരവിട്ടിരിക്കുന്നത്. മെറ്റയിൽ നിന്നുള്ള വിവരങ്ങൾ ശേഖരിക്കുക, സംശയമുള്ള ഫോണുകളുടെ ഫോറൻസിക് പരിശോധന നടത്തുക തുടങ്ങിയ മാർഗങ്ങളിലൂടെ സ്ക്രീൻഷോട്ടിന്റെ യഥാർത്ഥ ഉറവിടവും ഇതിന് പിന്നിലെ ഗൂഢാലോചനയും കണ്ടെത്താനാണ് പുതിയ അന്വേഷണ സംഘത്തിന്റെ തീരുമാനം.
