മുഖ്യമന്ത്രിയായി ചുമതലയേറ്റ ശേഷം ആദ്യമായി വിഡി സതീശൻ ഡൽഹിയിലേക്ക് പറക്കുന്നു. കോൺഗ്രസ് ഹൈക്കമാൻഡുമായി കെപിസിസിയുടെ സമ്പൂർണ്ണ പുനഃസംഘടന സംബന്ധിച്ച നിർണായക ചർച്ചകളിലാണ് അദ്ദേഹം.

മുഖ്യമന്ത്രി സ്ഥാനത്തേക്ക് തന്നെ പിന്തുണച്ച സോനിയാ ഗാന്ധി, രാഹുൽ ഗാന്ധി, മല്ലികാർജുൻ ഖാർഗെ, പ്രിയങ്ക ഗാന്ധി എന്നിവരോട് നന്ദി അറിയിക്കാനും അദ്ദേഹം ഈ യാത്രയിൽ ലക്ഷ്യമിടുന്നു. കെപിസിസി അധ്യക്ഷ സ്ഥാനത്തേക്ക് തനിക്ക് പൂർണ്ണ വിശ്വാസമുള്ള ഒരു നേതാവിനെ നിയമിക്കണമെന്ന ആവശ്യം ഹൈക്കമാൻഡിന് മുന്നിൽ അദ്ദേഹം ശക്തമായി ഉന്നയിക്കും.

ഉമ്മൻ ചാണ്ടി സർക്കാരിന്റെ കാലത്ത് മുഖ്യമന്ത്രിയും കെപിസിസി പ്രസിഡന്റുമായിരുന്ന വിഎം സുധീരനും തമ്മിലുണ്ടായിരുന്ന ഭിന്നത ഭരണത്തെ തളർത്തിയ അനുഭവം ആവർത്തിക്കരുതെന്ന ബോധ്യമാണ് സതീശനെ നയിക്കുന്നത്. ഭരണവും പാർട്ടിയും തമ്മിൽ കൃത്യമായ ഏകോപനത്തോടെ മുന്നോട്ടുപോകണമെന്നാണ് അദ്ദേഹത്തിന്റെ നിലപാട്.

മുൻപ് മുഖ്യമന്ത്രി ആരാകുമെന്ന സസ്പെൻസ് നിലനിന്ന സാഹചര്യത്തിലായിരുന്നു സതീശന്റെയും രമേശ് ചെന്നിത്തലയുടെയും അവസാന ഡൽഹി യാത്ര. എംഎൽഎമാരുടെ വലിയൊരു വിഭാഗം കെസി വേണുഗോപാലിനെ പിന്തുണച്ചിരുന്നുവെന്ന പ്രചാരണവും ശക്തമായിരുന്നു. എന്നാൽ ആ വെല്ലുവിളികളെ മറികടന്ന് ഹൈക്കമാൻഡ് സതീശന് അനുകൂലമായി തീരുമാനമെടുക്കുകയായിരുന്നു.

നിലവിൽ ഈ യാത്രയിൽ ഔദ്യോഗിക സർക്കാർ പരിപാടികളോ കൂടിക്കാഴ്ചകളോ ആസൂത്രണം ചെയ്തിട്ടില്ല. കേരള ഹൗസിൽ ജീവനക്കാർ മുഖ്യമന്ത്രിക്ക് വിപുലമായ സ്വീകരണമാണ് ഒരുക്കിയിരിക്കുന്നത്. പഴയ അനിശ്ചിതത്വങ്ങൾ മാറ്റി തികച്ചും സമാധാനത്തോടെയും റിലാക്സ് ആയുമുള്ള ‘കൂൾ സിഎം’ ലുക്കിലാണ് വിഡി സതീശൻ ഡൽഹിയിലേക്ക് പറക്കുന്നത്.

കേരള രാഷ്ട്രീയത്തിലും കോൺഗ്രസ് പാർട്ടിയിലും വലിയ മാറ്റങ്ങൾക്ക് വഴിതുറക്കുന്ന സുപ്രധാന ചർച്ചകൾക്കാണ് ഇനി ഡൽഹി സാക്ഷ്യം വഹിക്കാനൊരുങ്ങുന്നത്.